Ҳареди яҳудийлари полиция билан тўқнашди

Исроил ташқи томондан кўп жабҳали уруш ва Эрон билан ядровий қарама-қаршилик остонасида турган бир пайтда, ички томондан мажбурий ҳарбий хизмат инқирози билан ларзага келмоқда. Ҳарбий хизматга боришни рад этган минглаб ультра-ортодокс яҳудийлар (Ҳаредилар) оғир жарималар ва санкцияларни назарда тутувчи янги қонун лойиҳасига қарши Ғарбий Қудусда асосий йўлларни тўсиб қўйиб, полиция билан тўқнашдилар.

Исроилда узоқ вақтдан бери баҳс мавзуси бўлиб келаётган мажбурий ҳарбий хизмат масаласи, мамлакат бир неча жабҳада кескинликни бошдан кечираётган бир даврда қайта аланга олди.

Ультра-ортодокс сифатида танилган Ҳареди яҳудийлари ҳарбий хизматдан бўйин товлаганларга нисбатан пул жаримаси ва чекловларни ўз ичига олган янги қонун лойиҳасига қарши Қудус бошлиқ кўплаб нуқталарда норозилик намойишлари ўтказдилар.

Анъанавий қора костюм, оқ кўйлак ва фетр шляпалари билан ажралиб турувчи намойишчилар шаҳарларнинг асосий йўлларини тўсиб қўйиб, ҳаётни тўхташ даражасига келтирдилар. Полиция билан вақти-вақти билан тўқнашувлар юз берар экан, ушбу ҳаракатлар мамлакат кун тартибининг юқори поғоналаридан жой олди.

Тахминан 9 миллионлик Исроил аҳолисининг 12 фоизини ташкил этувчи Ҳареди яҳудийлари диний сабабларга кўра мажбурий ҳарбий хизматга қарши чиқмоқдалар.

Эркаклар учун 3 йил, аёллар учун эса 2,5 йил бўлган ҳарбий хизмат муддатини ўташни рад этаётган бу гуруҳ йиллар давомида шунга ўхшаш намойишлар билан ҳукуматларни ортга чекинишга мажбур қилишга уриниб келади.

Ҳареди жамоасининг катта қисми Ғарбий Қудусдаги Меа Шеарим маҳалласи ҳамда Тель-Авив яқинидаги Бней-Брак шаҳрида истиқомат қилади. Сиёсий майдонда ҳам таъсир кучига эга бўлган “Бирлашган Таврот” ва “Шас” партиялари орқали ҳукуматда вакилларига эга бўлган Ҳаредилар ўтмишда ҳам ҳарбий хизмат баҳслари туфайли коалиция инқирозларининг марказида бўлган эдилар.

Исроил ташқи жабҳада ҳарбий операцияларини давом эттираётган бир пайтда қайта кўтарилган ушбу намойишлар мамлакат ичида янги сиёсий ва ижтимоий кескинликдан дарак сифатида баҳоланмоқда.