Колумбияда ҳарбий самолёт қулаб тушди

Колумбия Ҳаво кучларига тегишли “Геркулес” (Hercules) типидаги самолёт Пуэрто-Легизамода учиш вақтида ҳалокатга учради. Самолёт бортида бўлганлардан 8 киши ҳалок бўлди, 73 киши жароҳатланди.

Колумбия жанубида ҳарбий юк ташувчи самолёт учишдан кўп ўтмай қулаши натижасида, дастлабки маълумотларга кўра, 8 киши ҳаётдан кўз юмгани ва 73 киши тан жароҳати олгани билдирилди.

Путумайо валийси Жон Габриэль Молина Акоста “El Tiempo” газетасига берган баёнотида, авиаҳалокатда шу пайтгача 8 киши ҳалок бўлганини, 73 киши жароҳатланганини ва 15 нафар ярадорнинг аҳволи оғир эканини маълум қилди.

Юк ташувчи самолётда жами 125 киши бўлганини айтган Молина Акоста, улардан 112 нафари ҳарбий, 2 нафари полиция ходими ва 11 нафари экипаж аъзолари эканини қайд этди.

Молина Акоста прокуратура ҳодиса юзасидан тергов бошлаганини таъкидлаб, шундай деди:

“Самолётда 100 дан ортиқ киши борлигини билардик. Эрталабдан бери давом этаётган қутқарув ишларидан сўнг 8 киши ҳалок бўлгани, 73 киши жароҳатлангани ва 15 кишининг аҳволи критик экани аниқланди. Ҳалокат сабабини ҳозирча билмаймиз, бизга маълум бўлган ягона нарса – самолёт ҳавога кўтарилганидан бир неча дақиқа ўтиб қулаганидир.”

Колумбия Ҳаво кучларига тегишли, FAC-10016 рўйхат рақамли C-130H Hercules типидаги юк ташувчи самолёт кеча Путумайо маъмурий ҳудудига қарашли Пуэрто-Легизамо шаҳарчаси яқинида ҳалокатга учраган эди. Ҳалокат ҳарбий ёрдам самолёти учиб кетганидан кўп ўтмай, аҳоли пунктидан тахминан 3 километр узоқликда содир бўлган.

Ижтимоий тармоқларда тарқалган тасвирларда юк ташувчи самолёт қулаган жойда қора тутун ва аланга кўтарилаётгани акс этган.