Ўрта Шарқда устунлик кимда?

Ўрта Шарқдаги уруш 28-кунига кирар экан, тўқнашувнинг глобал мувозанатларга таъсири тобора чуқурлашиб бормоқда. Ракеталар соясида давом этаётган урушга Ғарб қандай қараётгани борасида Британиядан ҳайратланарли таҳлил келди. Британиянинг “The Economist” журнали ўзининг диққатга сазовор муқоваси билан Эроннинг кучли мавқеига ишора қилиб, халқаро кун тартибига “бомба”дек тушди.

Ўрта Шарқни олов ичида қолдирган уруш ракеталар соясида ўз таъсирини ошириб давом этмоқда. Минтақавий кескинликни авж олдирган тўқнашувлар нафақат ҳудудга, балки бутун дунёга чуқур таъсир кўрсатмоқда. Ушбу критик жараёнда “The Economist” журнали сўнгги сонининг муқоваси билан халқаро жамоатчилик эътиборини тортди.

Журнал муқовасида дунёни кафтига олган ва харитани ғижимлаётгандек сиқаётган улкан қўл тасвирланган ҳайратланарли визуалдан фойдаланилган. Ушбу кучли рамзий маънони тўлдириб турган энг диққатга сазовор детал эса қўл бармоғидаги Эрон байроғи туширилган узук бўлди. Бу тасвир Эроннинг ҳам минтақавий, ҳам глобал миқёсда ортиб бораётган таъсирини ифодаласа, муқовадаги “Advantage Iran” (Устунлик Эронда) ибораси ҳамманинг диққатини тортди.

Муқовадаги мақолада қуйидаги фикрларга ўрин берилган:

“Бир ой давом этган бомбардимон ҳеч нарса келтирмади. Дональд Трамп вазиятни янада кескинлаштирадими ёки музокара бошлайдими?”

Бошқа томондан, журнал таҳлилида АҚШ Президенти Дональд Трампнинг сиёсати Эронга кутилгандек таъсир кўрсатмагани таъкидланди. Мақолада Трамп Эронга нисбатан қатъий баёнотлар ва ҳарбий таҳдидлар билан тўла ҳафтага раҳбарлик қилгани, фуқаролик энергетика инфратузилмасига эҳтимолий ҳужумлар кун тартибига келгани эслатиб ўтилди. Бироқ бу босим Эронни чекинишга мажбур қилмагани, аксинча, бозорларда тебранишлар келтириб чиқаргани айтилди.

Таҳлилда, шунингдек, Вашингтон маъмурияти қисқа вақт ичида сиёсатини ўзгартириб, яширин тинчлик музокаралари эҳтимолини кун тартибига олиб чиққанига диққат қаратилди. Бу билан бирга, Пентагоннинг 82-ҳаво-десант дивизиясидан баъзи бўлинмаларни минтақага юбориш режаси ҳарбий кескинлик ҳали ҳам стол устида эканидан далолат берувчи ривожланиш сифатида баҳоланди.

Мавжуд ноаниқликлар соясида Эрон раҳбарияти воқеалардан тўғридан-тўғри зарар кўрмаётгани ва майдондаги ўз мавқеини сақлаб қолаётгани билдирилмоқда. “The Economist” журналига кўра, ҳозирги манзара Теҳрон ўз рақибларига нисбатан стратегик устунликка эришганини кўрсатмоқда.