Қозоғистонда ички авиарейсларда биометрия жорий этилади

Ички рейслар учун аэропортларда биометрик тизим пайдо бўлади. Бу ҳақда ҳукумат йиғилишида транспорт вазири Нурлан Сауранбаев маълум қилди.

Вазир авиация соҳасини рақамлаштириш ҳақида гапириб берди. Унинг маълумотларига кўра, “Q-Gate” тизими назоратдан ўтиш вақтини 3 дақиқадан 50 сониягача қисқартириш имконини беради.

Маълумот учун: “Q-Gate” тизими – бу Қозоғистоннинг айрим аэропортларида ходим иштирокисиз паспорт назоратидан тез ўтиш учун қўлланиладиган автоматлаштирилган чегара назорати тизимидир.

Вазирнинг сўзларига кўра, ҳозирда Астана ва Алмати аэропортларида шундай терминаллардан 16 таси ишламоқда. Жорий йилда Чимкент, Атирау, Ақтўбе ва Ақтау шаҳарларида яна 16 та терминал ўрнатиш режалаштирилган – ҳар бир шаҳарда 4 тадан терминал бўлади.

Кейинги босқичда Қозоғистонда ички рейсларда биометрияни жорий қилиш кўзда тутилмоқда. Пилот лойиҳани Астана – Чимкент йўналишида амалга ошириш режалаштириляпти.

Бундан ташқари, юк ташиш сегментида “e-Freight” тизими йўлга қўйилмоқда. Транспорт вазирлигининг кутишича, ушбу тизим юкларни қайта ишлаш вақтини 1 кундан 1 соатгача қисқартириш ва жараёнларни тўлиқ рақамлаштириш имконини беради.

Граждан авиацияси қўмитаси (ФАҚ) маълумотларига кўра, 2026 йилнинг дастлабки тўрт ойида Қозоғистон авиакомпаниялари 4,6 миллион йўловчи ташиган.

Маълумот учун: Таққослаш учун, 2025 йил якунларига кўра ушбу кўрсаткич 15,4 миллион кишини ташкил этган эди.

Ўз навбатида, мамлакат аэропортлари тўрт ой ичида 9 миллион йўловчига хизмат кўрсатган бўлса, бутун 2025 йил давомида бу кўрсаткич 31,8 миллиондан иборат бўлган.

Шунингдек, ФАҚ аниқлик киритишича, охирги беш йилда Қозоғистонда транзит парвозларнинг тўрт баробар ўсиши қайд этилган. Ҳозирги вақтда, уларнинг маълумотларига кўра, айнан транзит мамлакатнинг аэронавигация хизматидан ундириладиган даромадларининг асосий қисмини шакллантирмоқда.

Бундан ташқари, халқаро йўналишлар тармоғини кенгайтириш давом этмоқда. 2026 йилда 15 та янги халқаро йўналиш очилиши режалаштирилган бўлиб, улардан тўрттаси аллақачон иш бошлаган.