Трампдан Нетаняхуга қаттиқ сўзлар

АҚШ президенти Дональд Трамп телефон мулоқоти чоғида Исроил бош вазири Бинямин Нетаняхуга Ливан билан кескинликни кучайтиргани учун ғазабланиб, “Лаънати телба” дегани иддао қилинди.

АҚШда жойлашган “Axios” хабарлар сайти АҚШ президенти Дональд Трампнинг Исроил бош вазири Бинямин Нетаняху билан ўтказган телефон сўзлашуви хусусида диққатга сазовор бир иддаони ўртага ташлади. АҚШнинг юқори мартабали расмийларига таянилган хабарга кўра, Трамп Ливан билан кескинликни авж олдиргани сабабли Нетаняхудан ғазабланган.

Ҳизбуллоҳнинг Исроилга қаратилган ҳужумларидан хабардор эканини ва Исроилнинг жавоб қайтариш ҳуқуқи мавжудлигини айтган Трамп, бунга қарамай, Исроил армияси сўнгги кунларда Ливанда номутаносиб равишда куч қўллаганини таъкидлади. Бу вазият Эрон билан ўт очишни тўхтатиш келишувини узайтириш ҳаракатларини қийинлаштираётганига диққат қаратган Трампнинг Нетаняхуга, “Сен лаънати бир телбасан”, дегани илгари сурилди.

Трампнинг, шунингдек, Нетаняхуга ўзи ҳақидаги коррупция ишини ва президент Исаак Герцогнинг уни афв этиши учун қилган чақириқларини эслатиб, “Агар мен бўлмаганимда қамоқда бўлардинг. Мен сени ҳимоя қилиб келяпман. Ҳамма сени ёмон кўради. Шу сабабли ҳамма Исроилни ёмон кўради. Нима қилаётганингни ўйлаяпсанми ўзи?” дегани иддао қилинди. Нетаняхунинг эса, “Хўп, хўп, ҳамма нарса жойида эканига ишонч ҳосил қилинг”, деб жавоб бергани билдирилди. Исроил Бош вазирлик офисидан хабарга мавзу бўлган ушбу иддаолар бўйича ҳеч қандай баёнот берилмади.

Трамп Нетаняху билан телефонда гаплашганидан сўнг, “Исроил бош вазири Бинямин Нетаняху билан жуда маҳсулдор суҳбат ўтказдим. Байрутга аскар юборилмайди ва йўлга чиққан аскарлар ҳам аллақачон ортга қайтарилди”, деган эди. Юқори даражали вакиллар орқали Ҳизбуллоҳ билан ҳам алоқа ўрнатганини айтган Трамп, “Улар ҳам барча тўқнашувларни тўхтатишга рози бўлишди. Исроил уларга ҳужум қилмайди, улар ҳам Исроилга ҳужум қилмайди”, деган ибораларни қўллаган эди.

Нетаняху эса Трампнинг Ливандаги тўқнашувлар тўхтатилиши йўналишидаги баёнотига қарамай, ҳужумлар давом этишини билдирган эди. Нетаняху, “Бу оқшом президент Трамп билан гаплашдим ва унга, агар Ҳизбуллоҳ шаҳарларимизга ва ватандошларимизга ҳужум қилишни тўхтатмаса, Исроил Байрутдаги нишонларга зарба беришини айтдим. Бу позициямиз ўзгаргани йўқ. Бунга параллел равишда Исроил армияси Ливан жанубида режалаштирилганидек ўз операцияларини давом эттиради”, деган эди.