Индонезияда осмон сариққа бўялди

Индонезияда бир неча кундан бери давом этаётган ўрмон ёнғинлари келтириб чиқарган тутун аҳоли саломатлигига таҳдид солмоқда. Осмон сариқ рангга кирган ва кўриш масофаси деярли нолга тушган ҳудудларда 277 мингдан ортиқ ўткир нафас йўллари инфекцияси ҳолати қайд этилди, беморларнинг 62 минг 400 нафарини 5 ёш ва ундан кичик болалар ташкил этди.

Индонезияда ўрмон ёнғинлари сабабли тарқалган заҳарли тутун ҳаётга салбий таъсир кўрсатмоқда. Айниқса, Ғарбий Калимантан вилоятида таъсирини кўрсатаётган тутун ҳавонинг ифлосланиш даражасини хавфли даражага етказди ва кўплаб одамларнинг нафас йўллари касалликларига чалинишига сабаб бўлди. Ёнғинлар туфайли мактаблар ёпилган ва иқтисодий фаолият издан чиққан ҳудудларда аҳоли саломатлиги бўйича хавотирлар ортмоқда.

Индонезия Соғлиқни сақлаш вазирлиги маълумотларига кўра, 11 октябрь ҳолатига кўра, ёнғинлардан зарар кўрган 7 та вилоятдаги 63 та туман ва шаҳарда 277 минг 75 та ўткир нафас йўллари инфекцияси қайд этилган. Бу ҳолатларнинг 62 минг 400 таси 5 ёш ва ундан кичик болаларда кузатилган.

Метеорология, климатология ва геофизика муассасаси (BMKG) маълумотларига кўра, Палангка-Рая шаҳрида чоршанба эрталаб ҳаво сифати хавфли даражада қолган, инсон саломатлиги учун хавф туғдирувчи майда заррачалар (PM2.5) зичлиги муассаса томонидан энг юқори ифлосланиш категорияси учун белгиланган меъёрдан тахминан 5 бараварга етган.

Индонезия Кабинет котиби Тедди Индра Вижая ўрмон ёнғинларига қарши курашиш учун 60 мингдан ортиқ ходим жалб этилганини маълум қилди. Мамлакатнинг 6 та ҳудудида жами 639 гектар майдондаги ёнғинларни ўчириш ишлари давом этмоқда.

Ҳукумат маълумотларига кўра, август ва сентябрь ойларида ёнғинларга қарши кураш доирасида 64 та самолёт ва 54 минг 394 нафар ходим сафарбар қилинган. Индонезиядаги ёнғинлардан тарқалган оғир тутун Жануби-Шарқий Осиёдаги кўплаб мамлакатларни ҳам ўз таъсири остига олди.

Ёнғинларнинг асосий сабаблари қаторига қишлоқ хўжалиги экин майдонларини очиш мақсадида ўсимлик қопламини ёқиш киради. Ёғингарчиликни камайтирган Эль-Ниньо ҳаво ҳодисаси ҳам ёнғинлар таъсирини оғирлаштирди. Индонезия Ўрмончилик вазирлиги маълумотларига кўра, январь–июль даврида ёнғинлар туфайли 202 минг гектардан ортиқ майдон зарар кўрган.

Шу билан бирга, Индонезияда жойлашган Иқтисодиёт ва ҳуқуқий тадқиқотлар маркази томонидан ўтказилган тадқиқотда ўрмон ёнғинларининг мамлакат иқтисодиётига келтирадиган зарари жорий йилда тахминан 1,7 миллиард долларга етиши мумкинлиги билдирилди.