Ўлимсизлик илинжидаги миллиардерга кутилмаган зарба

Қариликка қарши ноодатий усуллари билан танилган машҳур биоҳакер Брайан Жонсон бу сафар қилган ишлари билан эмас, балки уйида дуч келган кутилмаган муаммо билан кун тартибига чиқди. Саломатлик борасидаги қатъий одатлари ва ўта тартибли турмуш тарзи билан танилган миллиардернинг ҳашаматли уйидаги спорт залидан моғор топилиши ижтимоий тармоқларда катта шов-шувга сабаб бўлди.

Қариликни секинлаштириш учун қўллайдиган ноодатий усуллари ва ўлимсизлик истаги билан тез-тез муҳокама қилинадиган Брайан Жонсон бу гал уйидаги спорт залида пайдо бўлган моғор муаммоси билан диққат марказига тушди. Жонсон кеча эрталаб TikTok’да эълон қилган видеосида спорт залида моғор аниқланганини маълум қилди.

Тасвирларда Жонсон тўлиқ ҳимоя кийимини кийган ҳолда спорт залини кўздан кечираётгани кўринган. Шунингдек, видеода зал бўшатилиб, унинг айрим қисмлари бузиб ташлангани ва ҳудуд чуқур тарзда янгилангани акс этган. Жонсоннинг соғлиқни сақлаш борасидаги ўта талабчанлиги ҳисобга олинса, моғор пайдо бўлгани унинг кузатувчиларининг ҳам эътиборини тортди.

Ушбу постдан сўнг ижтимоий тармоқларда кўплаб изоҳлар қолдирилди. Айрим фойдаланувчилар ўз уйларида ҳам шундай муаммоларга дуч келганликларини айтган бўлса, бошқалари моғор сабабли бошидан кечирган муаммолари уларнинг “ҳаётини барбод қилганини” билдирди.

Бир фойдаланувчи эса Жонсоннинг саломатликка ҳаддан ташқари эътибор қаратишига ишора қилиб: “Чуқур нафас олинг, стресс кортизол даражангизни кўтариб юборади”, дея вазиятга ҳазил билан муносабат билдирди.

“US News” нашри келтирган маълумотларга кўра, АҚШдаги уйларнинг қарийб 47 фоизида маълум даражада моғор ёки намлик мавжуд. АҚШ Касалликларни назорат қилиш ва олдини олиш марказлари (CDC) эса моғор таъсири бурун битиши, қичишиш ва нафас олишда хириллаш каби аломатларга, баъзи ҳолларда эса нафас олишнинг қийинлашишига олиб келиши мумкинлигини таъкидламоқда.

Мутахассисларнинг фикрича, уйларда моғор ҳосил бўлиши фақат ёмон ҳид ёки кўриниш муаммоси эмас. Деворлардаги қора ва яшил доғлар, деразалардаги қуюқ буғланиш, намгарчилик ҳиди, бўёқларнинг кўчиши ва мебеллар ортидаги намлик моғор пайдо бўлаётганидан дарак бериши мумкин. Айниқса, келиб чиқиши номаълум аллергик аломатлар юзага келганда, муҳитни шамоллатиш ва муаммонинг манбасини аниқлаш тавсия этилади.