Қозоғистонликлар Дубайга миллий ҳайдовчилик гувоҳномаси билан борадиган бўлдилар

Қозоғистон ва БАА бир-бирларининг ҳайдовчилик гувоҳномаларини ўзаро тан олдилар. Тегишли келишувни Қозоғистон ички ишлар вазири Ержан Саденов ва Бирлашган Араб Амирликлари бош вазири ўринбосари – ички ишлар вазири шайх Саиф бин Заид Ал Наҳайян имзоладилар. Бу ҳақда ИИВ матбуот хизмати хабар бермоқда.

Вазирлик томонидан маълум қилинишича, томонлар ИИВ раҳбари Ержан Саденовнинг 2026 йил 25 июнь куни Абу-Дабига амалга оширган ташрифи давомида ҳайдовчилик гувоҳномаларини ўзаро тан олиш ва алмаштириш тўғрисидаги меморандумни имзолаганлар.

Меморандум, шунингдек, ҳужжатда назарда тутилган ҳолатларда икки давлат ҳайдовчилик гувоҳномаларини алмаштиришнинг соддалаштирилган тартибини ҳам кўзда тутади.

У томонлар зарур бўлган ички давлат тартиб-таомилларини якунлаганидан сўнг кучга киради.

Имзоланган ҳужжат маъмурий тартиб-таомилларни соддалаштириш ва икки давлат ватандошлари учун қўшимча қулайликлар шакллантириш имконини беради, деб қайд этди ИИВ.

“Ҳар йили Бирлашган Араб Амирликларига 400 мингга яқин Қозоғистон ватандоши ташриф буюради. Бундан ташқари, 14 мингга яқин қозоғистонлик БАА ҳудудида доимий яшайди. Имзоланган меморандум улар учун ҳайдовчилик гувоҳномаларидан фойдаланиш ва уларни алмаштиришда янада қулай шароитлар ҳозирлаш имконини беради” деб маълум қилди ҳуқуқ-тартибот маҳкамаси.

Қозоғистон ва БАА ИИВ раҳбарларининг учрашувида мамлакатларимиз учун манфаатли бўлган бошқа масалалар ҳам кўтарилди.

“Томонлар жиноятчиликка, жумладан, уюшган трансмиллий жиноятчиликка, кибержиноятчиликка ва гиёҳванд моддаларнинг ноқонуний айланишига қарши курашиш соҳасида икки томонлама ҳамкорликни янада ривожлантириш истиқболларини, шунингдек, жиноятчиларни қидириш, тезкор маълумот алмашиш, замонавий технологияларни жорий этиш ва кадрлар тайёрлаш масалаларини муҳокама қилдилар” деб хабар беради ИИВ матбуот хизмати.

Вазирлик томонидан қайд этилганидек, Қозоғистон делегацияси Абу-Дабида БАА Инқирозли вазиятлар бўйича миллий агентлиги фаолияти билан танишди. Шунингдек, Ержан Саденов “EDGE Group” технологик конгломерати раҳбарияти билан учрашув ўтказди. Қозоғистон ИИВ раҳбарига сунъий интеллект, киберхавфсизлик, махсус техника ва қурол-яроғ соҳаларидаги илғор ишланмалар, шунингдек, ҳуқуқ-тартибот фаолияти учун замонавий технологик ечимлар тақдим этилди.

ИИВ эришилган келишувлар Қозоғистон-Амирликлар ҳамкорлигини янада мустаҳкамлашга ва ўзаро манфаатли кенг кўламли масалалар бўйича амалий шерикликни кенгайтиришга хизмат қилишини таъкидлади.