Туркистон вилоятида БФҚ ишлаб чиқариш заводи қурилишига старт берилди

Туркистон вилоятида ишлаб чиқариш ва фармацевтика соҳасини ривожлантиришга қаратилган йирик инвестиция лойиҳасига старт берилди. Саврон туманида “Turan” махсус иқтисодий зонасининг “Ўранғай” кичик зонаси ҳудудида “Orzax Central Asia” МЧЖнинг биологик фаол қўшимчалар ишлаб чиқариш заводи пойдеворига вақт капсуласини қўйиш маросими бўлиб ўтди.

Маросимда сўзга чиққан Туркистон вилояти ҳокими Нуралхан Кушеров минтақада давлат раҳбари Қосим-Жўмарт Тўқаевнинг иқтисодиётни диверсификация қилиш ва импорт ўрнини босувчи ишлаб чиқаришларни ривожлантириш бўйича топшириқларини амалга ошириш юзасидан тизимли ишлар олиб борилаётганини таъкидлади.

“Давлат раҳбари Қосим-Жўмарт Кемелевич мамлакат иқтисодиётини диверсификация қилиш ва импорт ўрнини босувчи ишлаб чиқаришни ривожлантиришни топширди. Шу муносабат билан биз иқтисодиётнинг хомашё моделидан узоқлашиб, импорт ўрнини босишга қаратилган аниқ лойиҳаларни босқичма-босқич амалга оширмоқдамиз. Вилоятда пахта-текстиль, гўшт, жўхори ва мебель кластерлари ривожланмоқда, янги ишлаб чиқариш объектлари очилмоқда. Умуман олганда, импорт ўрнини босиш бўйича комплекс ишлар натижасида қиймати 176 миллиард тенге бўлган 31 та лойиҳа ишга туширилди. Жорий йилда 280 миллиард тенгелик 39 та лойиҳа амалга оширилмоқда. Бозорни қўшимча ўрганиб чиқиб, Туркистон вилоятида фармацевтика маҳсулотлари истеъмол бозорининг тахминан 100 миллиард тенгеси импортга боғлиқ эканини аниқладик. Давлат раҳбарининг Туркия Республикасига расмий ташрифи давомида эришилган келишувлар натижасида бугун замонавий ишлаб чиқариш пойдевори қўйилмоқда. Бу мамлакатнинг импортга қарамлигини камайтириш, минтақавий иқтисодиётни мустаҳкамлаш ва аҳоли саломатлиги учун зарур бўлган маҳсулотларни мамлакат ичида чиқаришга қаратилган муҳим қадамдир. Саломатлик учун зарур маҳсулотларни ўз мамлакатимизда ишлаб чиқариш миллий хавфсизликнинг энг муҳим кафолатидир. Лойиҳа тўлиқ амалга оширилгач, 500 га яқин маҳаллий аҳоли доимий иш билан таъминланади. “Orzax Central Asia” компаниясининг лойиҳаси нафақат минтақанинг иқтисодий салоҳиятини оширишига, балки миллий фармацевтика тармоғини янги босқичга олиб чиқишига ишонаман. Компания раҳбари Алимоғлу Селманга ва унинг жамоасига муваффақиятлар тилайман. Барчангизни ушбу муҳим ташаббус билан чин қалбимдан табриклайман”, – деди вилоят раҳбари.

“Orzax Central Asia” МЧЖ муассиси Алимоғлу Селман Қозоғистон ҳукуматига ва вилоят раҳбариятига Қозоғистонда, жумладан Туркистон вилоятида инвестиция лойиҳасини амалга оширишда кўрсатилган қўллаб-қувватлаш учун миннатдорчилик билдирди ҳамда завод қурилиши белгиланган муддатларда якунланишини таъкидлади. Туркистоннинг тарихий аҳамиятига тўхталиб, у ушбу лойиҳа минтақанинг экспорт салоҳиятини оширишини қайд этди. Маросимда заводнинг капсуласи қўйилди.

“Orzax Central Asia” компаниясининг лойиҳаси Саврон туманида “Turan” махсус иқтисодий зонаси ҳудудида амалга оширилмоқда. Корхонага майдони 10 гектар бўлган эр участкаси ажратилган. Лойиҳанинг умумий инвестиция қиймати 20,4 млрд тенгени ташкил этади. Қурилиш ишлари 2026-2027 йилларда бўлиб ўтади. Тўлиқ фойдаланишга топширилгандан сўнг завод йилига 464 млн дона биологик фаол қўшимчалар ишлаб чиқаради ва 500 кишини доимий иш билан таъминлайди.

“Orzax Central Asia” МЧЖ муассиси сифатида “Orzaks Pharmaceuticals and Chemical Industry Inc.” корпорацияси - Туркиядаги биологик фаол қўшимчалар ишлаб чиқариш бўйича етакчи компаниялардан бири чиқмоқда. Бугунги кунда корпорация дунёнинг 50 дан ортиқ мамлакатига 150 дан ортиқ турдаги маҳсулотларни экспорт қилади.