Принц Ҳарри ва унинг рафиқаси Меган Маркл Британияга қайтади

Буюк Британия қироли Карл III нинг АҚШда яшовчи ўғли — Сассекс герцоги шаҳзода Ҳарри ва унинг рафиқаси Меган Маркл шу ойнинг охирида Британияга кўчиб ўтиши айтилмоқда. Принц Ҳарри 2020 йилда қироллик мажбуриятларидан воз кечиб, оиласи билан АҚШга кўчиб ўтган эди.

Британ оммавий ахборот воситалари тарқатган хабарларга кўра, Сассекс герцоги принц Ҳарри ва рафиқаси Меган Маркл шу ой охирида АҚШдан Буюк Британияга қайтиб, пойтахт Лондон ташқарисида жойлашган, Қироллик оиласига тегишли бўлмаган хусусий қароргоҳда истиқомат қиладилар.

Эр-хотиннинг фарзандлари — шаҳзода Арчи ва малика Лилибет ҳам сентябрь ойида Буюк Британиядаги мактабда ўқишни бошлайди.

Буюк Британия қироли Карл III жуфтликнинг АҚШдан Буюк Британияга қайтиш режаси ҳақида 16 август, якшанба куни хабар топди. Қирол Карл оилани тез-тез кўриб туриш имкониятини мамнуният билан қабул қилди.

Буюк Британия тахти вориси — Уэльс принци Уильям ва унинг рафиқаси Уэльс принцессаси Кейт Миддлтон ҳам эр-хотиннинг қайтиш режалари ҳақида огоҳлантирилган.

Принц Ҳарри ва унинг рафиқаси ўтган ойда фарзандлари билан Буюк Британияда қирол Карл билан кўришгани, аммо кўчиш режаси ушбу учрашувда муҳокама қилинмагани айтилмоқда.

Жуфтликнинг қироллик оиласининг ижрочи аъзолари сифатида ўз вазифаларига қайтиши режалаштирилмаган.

Принц Ҳарри 2020 йилда Қироллик вазифаларини тарк этганини эълон қилган, сўнг америкалик рафиқаси Меган Маркл билан АҚШга кўчиб ўтган эди.

Телекўрсатувларда ва ёзган китобида қироллик оиласини “ирқчилик” ҳамда “тоқат қилиб бўлмас”ликда айблаган шаҳзода Ҳарри, айниқса отаси ва акаси билан бўлган муносабатларига оид эътирозларга сабаб бўлган тафсилотларни ошкор қилган эди.