Покистонда масжид яқинида қонли ҳужум

Покистоннинг шимоли-ғарбидаги Ҳайбар-Пахтунхва вилоятида полиция мажмуасида жойлашган масжид яқинида портлаш содир бўлди. Маҳаллий матбуот хабарларига кўра, ҳужум оқибатида камида 15 киши ҳаётдан кўз юмди, 50 дан ортиқ киши жароҳат олди.

Покистоннинг Афғонистон чегарасидаги Ҳайбар-Пахтунхва вилоятида жума намози пайтида масжид нишонга олинди. Кохат шаҳрида полиция маркази яқинида содир бўлган кучли портлашда камида 15 киши ҳалок бўлди, 50 дан ортиқ киши жароҳат олди.

Юқори даражадаги қутқарув расмийси Билол Файзи жароҳатланганларнинг катта қисми масжиддаги жамоадан эканини билдирди. Жароҳатланганлар атрофдаги шифохоналарга етказилар экан, ортиб бораётган беморлар сони сабабли шифохонада фавқулодда ҳолат эълон қилинди.

Портлаш кучи атрофдаги уйлар ва иш жойларида ҳам оғир зарар етказди. Ижтимоий тармоқларда тарқалган кадрларда масжид томи қулагани, қутқарув гуруҳлари ва маҳаллий аҳоли вайроналар остидаги ярадорларни чиқариб, тез ёрдам машиналарига олиб ўтаётгани кўринди.

Воқеадан дарҳол кейин ҳудудга кўплаб тез ёрдам ва қутқарув гуруҳлари юборилди. Дастлабки маълумотларга кўра, портлаш худкушлик ҳужуми бўлиши мумкинлиги тахмин қилинаётган бўлса-да, ҳужумнинг табиати бўйича текширувлар давом этмоқда.

Ҳужум учун масъулиятни ҳали ҳеч қандай гуруҳ ўз зиммасига олмади. Associated Press агентлиги шубҳалар сўнгги йилларда полиция ва тинч аҳолига қарши ҳужумларини кучайтирган “Техрик-и Талибан Пакистан” (ТТП) номи билан танилган Покистон Толибонига қаратилиши мумкинлигини хабар қилди.

Ҳайбар-Пахтунхва бундан олдин ҳам масжидларни нишонга олган қонли ҳужумлар гувоҳи бўлганди. 2023 йилда вилоят маркази Пешовар шаҳридаги масжидга уюштирилган худкушлик ҳужумида 101 киши ҳалок бўлган эди.