Трамп Венесуэлага кўз тикди

АҚШ президенти Дональд Трамп Венесуэла АҚШнинг 51-штатига айланиши мумкинлигини илгари сурди. Эрон билан уруш яқин орада якунланишини таъкидлаган Трамп ҳужум қилиш қарорини: “Бу мен қилган энг яхши ишлардан бири эди”, деган сўзлар билан ҳимоя қилди.

АҚШ президенти Дональд Трамп Техасда ўтказилган сайловолди митингида нутқ сўзлади. Трамп Венесуэла билан муносабатлардан тортиб Эронга қарши ҳарбий операцияларгача бўлган ташқи сиёсат кун тартиби бўйича баёнотлар берди.

Венесуэла билан “ажойиб” муносабатда эканликларини билдирган Трамп ушбу мамлакатдан сезиларли миқдорда нефть сотиб олаётганликларини айтди. Америка нефть компанияларининг Венесуэлада муҳим инвестициялари борлигини таъкидлаган Трамп мамлакат яқин келажакда фаровон аҳволга келиши мумкинлигини илгари сурди.

Венесуэланинг АҚШга қўшилиши мумкинлигини таъкидлаган Трамп: “Балки яқин келажакда бу ер 51-штатимизга айланиши мумкин. Бунинг имкони бор, келинг, буни амалга оширайлик, у ерни 51-штатимизга айлантирайлик. Давлат раҳбари ўрнига губернатор сайлайлик”, деди.

Ўз нутқида Эрон билан давом этаётган урушга ҳам тўхталган Трамп тўқнашувни Эрон бошлаганини илгари сурди. Эрон раҳбарияти кўплаб америкалик ҳарбийларнинг ўлими учун жавобгар эканини таъкидлаган Трамп Теҳроннинг ядровий қуролга эга бўлишига йўл қўймаслик муҳимлигини урғулади.

Эроннинг ядровий қуролга эга бўлмаслиги эвазига нефть ва ёнилғи нархларининг юқори даражада сақланиб қолиши “жуда кичик товон” эканини айтган Трамп уруш яқин орада тугашини даъво қилди.

Трамп: “Яқин орада бу уруш тугайди, уларнинг армияси, ҳарбий-денгиз флоти ёки бошқа ҳеч нарсаси қолмади”, деди.

АҚШда ёнилғи нархлари яқин орада кескин тушишини ҳам илгари сурган Трамп Эрон бўйича олиб борилаётган сиёсат Конгрессга оралиқ сайловларда ўзларига салбий таъсир кўрсатади деб ўйламаслигини билдирди.

Эронга қарши ҳужум қилиш қароридан пушаймон ёки йўқлиги ҳақидаги саволга ҳам тўхталган Трамп: “Кеча кимдир сўраётган эди: ‘Агар қайтадан қилиш керак бўлса, Эронга барибир ҳужум қилармидингиз?’ Мен эса: ‘Шубҳасиз, бу мен қилган энг яхши ишлардан бири эди’, дедим”, дея таъкидлади.