АҚШда конгрессменлар қовун туширди

АҚШ Ҳарбий-денгиз флоти ташкил этилганининг 251 йиллигини нишонлаш тадбирлари америкалик сиёсатчилар йўл қўйган сурат хатолари сабабли масхара мавзусига айланди. АҚШлик губернатор ва конгрессменлар ўз ҳарбий-денгиз флотини қутлаш учун жойлаштирган суратларда Ҳиндистон ва Россияга тегишли ҳарбий кемалар борлиги маълум бўлди.

АҚШ Ҳарбий-денгиз флоти ташкил этилганининг 251 йиллиги муносабати билан штат губернаторлари, конгрессменлар ва давлат ходимлари бўлган кўплаб шахслар ижтимоий тармоқлардаги саҳифаларида ҳарбий кемалар суратларини бўлишиб, табрик хабарларини чоп этишди.

Бироқ суратлардаги кемаларнинг бир қисми Америка флотига эмас, балки Ҳиндистон ва Россияга тегишли экани ошкор бўлди.

Жоржия штати губернатори Брайан Кемп АҚШ Ҳарбий-денгиз флоти ташкил топган кун муносабати билан X ижтимоий тармоғидаги саҳифасида табрик хабарини эълон қилди.

Кемп: “Мамлакатимиз ташкил топган илк кунлардан бери Ҳарбий-денгиз флоти мамлакатимизни қўриқлаб келди ва денгизлар бўйлаб озодликни ҳимоя қилди”, деб ёзди.

У ўз хабарига “АҚШ Ҳарбий-денгиз флотига байрам муборак” деб ёзилган ва учта ҳарбий кема акс этган суратни илова қилди.

Суратни синчиклаб ўрганган Wall Street Journal мухбири Дэйв Браун кемаларнинг АҚШга тегишли эмаслигини аниқлаб: “Булар Ҳиндистон ҳарбий кемалари”, дея хабар қолдирди.

Суратдаги ҳарбий кемалар Ҳиндистон Ҳарбий-денгиз флотига тегишли INS Godavari, INS Brahmaputra ва INS Beas фрегатлари экани маълум бўлди.

Ушбу тасвир АҚШ ва Ҳиндистон флотларининг 2008 йилда ўтказилган “Malabar” қўшма ҳарбий машғулотлари вақтида суратга олинган эди.

Шимолий Каролина штатидан конгресс аъзоси Тим Мур ҳам АҚШ Ҳарбий-денгиз флоти байрамини қутлаш учун айнан шу суратдан фойдалангани маълум бўлди.

Огайо штати вакили Майк Довилла эса Россия ҳарбий кемалари акс этган сурат билан табрик йўллади.

АҚШ Чегара хизмати мутасаддиси Жеффри Динайс эса Россия Ҳарбий-денгиз флотига тегишли “Киров” синфидаги жанговар крейсер суратини бўлишди.

Сан-Диего шаҳри мэри Тодд Глория фойдаланган суратда эса Совет давридан қолган “Михаил Кутузов” крейсери жой олган эди.

“Freedom Caucus Foundation” ташкилотининг табрик суратида эса Ҳиндистон Ҳарбий-денгиз флотига тегишли INS Trikand фрегати акс этгани билдирилди.

Америкалик сиёсатчиларнинг бу хабарлари ижтимоий тармоқларда кулгига сабаб бўлди.

Фойдаланувчилардан бири Ҳиндистон ҳарбий кемаларига шама қилиб: “Бизнинг ҳарбий кемаларимиз ҳам бу ерга H-1B визаси билан келганми?” дея изоҳ қолдирди.

Яна бир фойдаланувчи эса сиёсатчиларнинг ўз ҳарбий-денгиз флотига тегишли кемаларни танимагани устидан кулди.