Россиядан Исроилга сирли парвоз

Россияга тегишли Туполев Ту-154 русумли ҳарбий самолёт ўтган кеча Исроилнинг Тель-Авив шаҳридаги Бен-Гурион аэропортига қўнди. Исроил оммавий ахборот воситалари томонидан “сўнгги йилларда ўхшаши кўрилмаган ва фавқулодда” деб баҳоланган ушбу парвоз ортидаги сир ошкор бўлди.

Юқори лавозимли мулозимлар ва ҳарбий хизматчиларни ташиш учун фойдаланиладиган Россияга тегишли ҳарбий самолётнинг Исроил пойтахти Тель-Авивга қўниши диққатни тортди.

Исроил давлат телевидениеси KAN хабарига кўра, Туполев Ту-154 русумли Россия ҳарбий самолёти Чкаловский авиабазасидан парвоз қилгач, кеча оқшом маҳаллий вақт билан соат 21:00 атрофида Бен-Гурион аэропортига қўнган.

KAN ушбу парвозни сўнгги йилларда ўхшаши кўрилмаган ва фавқулодда ҳодиса деб атади. Самолётнинг аэропортдаги тасвирлари тарқатилган бўлса-да, унда кимлар бўлгани ва Исроилга қайси мақсадда келгани ҳақида маълумот олишнинг имкони бўлмагани билдирилди.

Хабарда Исроил армияси, Бош вазир идораси ва Россиянинг Тель-Авивдаги элчихонаси ушбу парвоз бўйича шарҳ беришдан тийилгани айтилди. Шу билан бирга, ўтмишда Исроил ва Россия армиялари ўртасида Суриядаги Россия ҳарбий иштироки бўйича мулоқот олиб борилгани эслатиб ўтилди. Баас режими қулашидан олдин икки мамлакат ўртасида ушбу масалада мувофиқлаштириш механизми шакллантирилгани таъкидланди.

Исроилнинг Тель-Авив шаҳрига тунги вақтда қўнган Россия ҳарбий самолётига оид сир пардаси кейинги соатларда очилди.

Исроил давлат телевидениеси KAN исми ошкор этилмаган хорижий манбага таяниб берган хабарида, самолётда АҚШнинг илтимосига кўра Исроилга келган Россия Қуролли кучлари Бош штаби Бош разведка бошқармаси бошлиғи Игорь Костюков ҳамда бошқа юқори лавозимли россиялик мулозимлар бўлганини илгари сурди.

Хабарда Россия самолёти кейинчалик Исроилдан Абу-Дабига парвоз қилгани ва у ерда АҚШ, Россия ҳамда Украинанинг юқори лавозимли вакиллари иштирокида тинчлик саммити ўтказилиши билдирилди.

Хабарда, шунингдек, Россиянинг Эрон билан стратегик муносабатларига ҳам тўхталиб ўтилди. Эрон Миллий хавфсизлик олий кенгаши бош котиби Муҳсин Ризоий яқинда Москвада Россия президенти Владимир Путин билан учрашган эди.

Ризоий учрашувдан сўнг берган баёнотида Путиннинг Эронга қарши ҳужумларни қоралаганини ва урушни тугатиш учун ҳар қандай ёрдамни беришга тайёрлигини айтганини билдирди.