Аввал ўзингга боқ...

АҚШ кўчаларида тўқнашувлар тўхтамаяпти. Бутун дунё АҚШ полициясининг шиддатли муносабатини танқид қилмоқда. Ҳатто Хитой ва Россия ҳам АҚШга киноя қилмоқда. Узоқ йиллар давомида “диктатор”ликда айблаб келаётган ўлкалар олдида энди АҚШнинг ўзи юзи шувут. Кичик бир шаҳарча бўлган Фергюсонда 18 ёшли қора танли ўсмир Майкл Брауннинг қуролсиз бўлишига қарамай полиция тарафидан 6 бор ўқ узилиб ўлдирилиши ортидан бошланган норозилик намойишлар тинмаяпти. 10 кундан бери давом этаётган норозилик намойишларида 90 ёшли бир кампир ҳибсга олинди. Полициянинг “Тарқалинг” деган буйруғига амал қилмаган Хеди Эпштейн исмли қари аёл бироздан кейин озод этилди. Инглиз “Independent” газетасига интервью берган Эпштейн полициянинг атайлаб тинч аҳолига "тегажоқлик" қилиб ғазабини чиқараётганини ва шаҳарчадаги вазиятни яна да чигаллаштираётганини айтди. Намойишлар давом этаётган бошқа бир нуқта бўлган Сент-Луисда яшайдиган Эпштейн Ғаззони қўллаб-қувватлаб ўтказилган намойишларда иштироки билан танилган.

АҚШда полициянинг номутаносиб куч ишлатиши дунё миқёсида ҳазил-мазах мавзусига айланди. Зўравон ва тўнтарувчи Сиссининг ўлкаси Миср ҳам “Хавотирдамиз” деб баёнот бергандан кейин ҳолатни тушунаверинг. Сиёсий тузумлари туфайли тез-тез АҚШнинг танқидига учрайдиган Хитой, Россия ва Эрон ҳам “АҚШ бошқаларнинг ишига бурнини суққандан кўра, ўзининг ишини эпласин” деган сўзлар билан масхара қилишди.

Ҳибсга олинган 90 ёшли Хеди Эпштейн ҳодисаларнинг кучайишидан полицияни айбдор деб топди.