ИШИД инсон органларини сотмоқда

ИШИД террористик тўда аъзоларининг Мусулдаги фақирлардан ички органларини арзон-гаровга олиб, бадавлат кишиларга қиммат нархда сотаётгани айтилди. Минтақа аҳолисининг айтишича, террористлар орган тижорати учун ҳатто касалхона ҳам қуришган.

Сурия ва Ироқдаги ҳаракатини тўхтатиб бўлмаётган террористик ташкилот ИШИДнинг қатлиомларига доир янги маълумотлар ўртага чиқди. Россиянинг турк тилида чоп этиладиган “Sputnik News” сайтининг хабарига кўра, ИШИД аъзолари кенг қамровли инсон аъзолари контрабандаси билан шуғулланмоқда. Сайтга интервью берган Курдистон демократ партияси (КДП) Мусул матбуот котиби Саид Мамузиний берган маълумотларга кўра, ИШИД Ироқнинг Мусул шаҳрида инсон аъзолари билан тижорат қилиш учун касалхона очди.

ИШИДнинг инсон аъзоларини фақир-бечоралардан олиб, бадавлат кишиларга сотаётганлигини айтган Мамузиний “Қўлга олинган асирларга агар ўз аъзоларини берадиган бўлишса, эрта қўйиб юборишларини айтишмоқда” деди. “ИШИД касалхонани 2015 йил 13 июнь куни очди. Касалхона Саддам Ҳусайн номи билан аталди. Амалиётлар террор ташкилотининг врачлари тарафидан амалга оширилмоқда. Мусул халқининг кўпи фақир, йўқсил. Баъзилари фақирликдан ўз аъзоларини сотишга мажбур бўлмоқда” деди. Учрашган маҳаллий аҳолидан баъзилар унга “Иш йўқ. Бошқа шаҳарга бориб ишлашга ҳам имконимиз йўқ. Мажбуран органларимизни сотмоқдамиз” дейишган. Мамузиний ИШИДнинг органларни 4 миллион динорга (3333 АҚШ доллари) сотиб олаётганини билдирди. Унинг маълумотларига кўра, ИШИД жуда катта пулга сотаётган органларнинг кўпи Сурияга юборилмоқда. Мамузиний ИШИДнинг босқинчилигидан қочганлар сабабли 4 миллион бўлган Мусул аҳолисининг 1 миллионга тушиб кетганлигини таъкидлади. ИШИД 2014 йил 10 июнда Мусул ва ортидан баъзи бошқа шаҳарларни қўлга киритганди.