Россия, Асад-ДАИШ ҳамкорлиги

Россия фанлар академияси тизим таҳлили институти тадқиқотчиси Пионтковский “ДАИШ нефтини Асадга сотмоқда. Россия фирмалари ҳам бунда иштирок этишмоқда, айниқса Россия ташқи ишлари вазирлиги “дипломатик дахлсизликни” таъминламоқда” деди.

Пионтковский Россия мудофаа вазирлигининг Туркиянинг ДАИШдан нефть сотиб олаётганлиги борасидаги айбловларини Шимолий Ироқнинг “Нефть ташиётган юк машиналари бизники” деган сўзлари билан йўққа чиқарганини таъкидлади.

Рус мутахассиси Москва раҳбариятининг ДАИШнинг нефть тижоратига оид иддаоларини Туркияга йўналтириш ортида “ДАИШ-Асад алоқасининг фош бўлишининг олдини олишга уриниш” ётганлигига эътибор қаратди.

Россиянинг Суриядаги ҳаво операцияларининг кичик қисми ДАИШга йўналтирилган, умуман олганда эса Асаднинг мухолифлари нишон бўлаётганлигини билдириб, шуларни сўзлади: “Демак, биз ДАИШ билан жанг қилиш учун у ерга кирмаганмиз. Бу ерда Асад-Путин-ДАИШ учлиги манфаати ҳимоя қилинмоқда. Улар нафақат геологик  манфаатлар учун, айни вақтда нефть тижоратига ҳамкор эканликлари ҳам маълум бўлмоқда. Бу ҳолат Россияни дунё назарида қийин аҳволга солиб қўймоқда. Нима учун аскар ва зобитларимизни Сурияга юбормоқдамиз? ДАИШ билан нефть тижоратини қилиш учунми?”

АҚШдан аввал рус журналисти Алексей Венедиктовнинг 21 ноябрда ДАИШдан нефть сотиб оладиган асосий харидор Асад эканлигини айтганлигини билдирган Пионтковский ўзи ҳам бу борада мақолалар ёзганлигини, лекин Россия матбуоти буларни чоп этмаганлигини сўзлади.

Франциянинг Сурияда ДАИШ нефть манбаларини бомбалашни Париж ҳужумларидан аввал бошлаганлигини, Россия ташқи ишлар вазирлиги эса бунинг халқаро ҳуқуқ меъёрларига зид эканлигини айтганлигини ёдга солди.

Пионтковский Россиянинг Сурияда ДАИШдан бўлак барчани нишонга олганлигини билдириб “Россиянинг Суриядаги мақсади маълум. ДАИШ билан кураш баҳонасида Асад режимини қутқариб қолиш. Россия Сурияда мухолифларни йўқ қилиб, дунёни Асад ёки ДАИШдан бирини танлашга мажбур қилмоқчи” деди.

ДАИШнинг Асад кучлари учун таҳдид эмаслигини маълум қилган Пионтковский “Туркманлар Асад режимига қарши курашмоқда ва ДАИШ билан ҳеч қандай алоқаси йўқ. Путин уларни туркман бўлганлиги учун эмас, Асадга мухолиф бўлгани учун бомбаламоқда” деб айтди.

Пионтковский Путиннинг Сурияда Асад режимини қўллаб-қувватлашда ўзининг шахсий сабаблари борлигини ҳам билдирди.

“Путин Қаддафийнинг бошига тушганлари Асад билан такрорлангандан кейин навбат ўзига келишини билиб турибди. Асадни дастаклаши сиёсий бўлишдан ташқари шахсий ҳамдир. Бутун Россия сиёсий элитаси Ўрта Шарқда бўлиб ўтган воқеалар ўзларининг бошига тушишдан қўрқишмоқда.

Путин яқин келажакда иқтисодиётда яхши ўзгаришлар бўлмаслигини билади. Лекин давлат бошқарувини қўлида ушлаб қолмоқчи. Иқтисодиёти чўкаётган ўлка буни қандай таъминлаш мумкин? Телевидениеда уруш атмосфераси ва атрофи душманга тўла эканлигини кўрсатиб қилиш мумкин. Бу душманлар давомли ўзгармоқда. Аввал Украина, энди Туркия. Самолёт ҳодисаси бунинг учун яхши сабаб бўлди” деди.