Малика Дианани мен ўлдирдим!

У Британия қироллик оиласида ўзгача келин эди. 20 йил аввал Париждаги йўл транспорт ҳодисасида севгилиси билан бирга ҳалок бўлди. Воқеа, "автоҳалокат" деб қайд этилди. Лекин 80 ёшли MI5 агенти ўлим тўшагида ҳақиқатни тан олди: Малика Дианани мен ўлдирдим.

У 1961 йил 1 июлда туғилди. Исми Диана Спенсер эди. 1981 йил қурган турмуши орқали қироллик хонадонига келин бўлиб келди. Чунки у шаҳзода Чарльзга турмушга чиққанди. Бу турмушдан шаҳзода Уильям ва шаҳзода Гарри дунёга келди. Лекин эртакдек бошланган бу ҳаёт 1996 йил ниҳоясига етди. Малика Диана Чарльз билан ажрашишга қарор қилди. Бунинг сабаби Чарльзнинг хиёнати эди. Диана қироллик оиласидан ажралган бўлса ҳам ҳаёти газета саҳифаларидан тушмади. Мисрлик бизнесмен Доди ал-Фаёд билан ошиқ-маъшуқлиги роса шов-шув бўлди. Лекин Диана билан Фаёднинг муҳаббати автоҳалокат билан якунланди.

Диана билан севгилиси 1997 йил 31 августда Франция пойтахти Парижда юз берган автоҳалокатда ҳалок бўлди. Ушбу воқеа бахтсиз ҳодисадек кўринса ҳам, тортишувлар ва "суиқасд" деб иддао қилувчилар сира тинчимади. Энди бу иддаоларга яна бир эътироф қўшилди. Ўлим тўшагида ётган инглиз агенти Дианани ўлдирганини тан олди. 80 ёшли нафақадаги MI5 агенти Джон Хопкинс бу эътирофи билан яна шов-шувга сабаб бўлди. Докторлар бир неча ҳафталик умри қолганини билдиргач, Хопкинс қуйидагиларни тан олган:

“38 йил M15 учун хизмат қилдим. Ҳам машина муҳандиси, ҳам ўқ-дори мутахассиси сифатида етиштирилдим. 1973-1999 йилларда инглиз разведка хизмати учун малика Дианани ҳам қўшиб санаганда 23та суиқасд уюштирдим. Заҳарлаш орқали суиқасд уюштириш учун махсус билим олгандим. Диана ягона аёл қурбоним эди. Бундан ташқари, у қироллик оиласидан ўлдирган ягона одамим эди. Малика Дианага суиқасд уюштириш учун кўп вақт бир қарорга кела олмадим. Диана ҳаётининг энг гуллаган чоғида ўлишга лойиқ бўлмаган гўзал, назокатли аёл эди...”

Лэди Диана 1981 йил 29 июлда шаҳзода Чарльз билан турмуш қуриб, қироллик оиласига кирди. Лекин бу нарса унга бахт эмас, ўлим ҳукми эди. Диана билан оила қуриши шаҳзода Чарльз учун унчалик муҳим ҳодиса эмасди. Шаҳзода Чарльз эри бор Камилла Паркер Боулз деган хотин билан ҳамон дон олишиб юрарди. Буни билиб қолган Диана BBC каналига интервью берди: “Бу турмушда биз уч киши эдик. Яъни биттамиз ортиқчамиз” деди. Шу интервьюдан кейин ажрашишга қарор қилди. Ажрашганидан кейин Диана покистонлик юрак жарроҳи Хаснат Хан билан ишқий муносабатларда бўлиб, жамиятнинг эътиборини ўзига тортди. Лекин ораларидаги урф-одат фарқи Хан оиласининг норозилигига сабаб бўлди. Жуфтлик ажрашишга қарор қилди.  Диана ундан кейин мисрлик бизнесмен Доди ал-Фаёд билан муҳаббат саҳифасини очди. Лекин бу муҳаббат қиссаси сўроқ белгилари билан тўла автоҳалокат билан ниҳоясига етди.