Ер юмалоқ эмас!?

АҚШнинг Шимолий Каролина штатида ер сайёрасининг юмалоқ эмас, текис эканлигига ишонадиганлар тўпланишди. “Халқаро ясси ер конференцияси” деб номланган йиғилишда АҚШликлар “Уфқ чизиғига қаранг, теп-текис”, “Бу шайтоннинг энг улкан ёлғони” каби сўзлар билан дунёнинг яссилигини ёқлаб чиқишди.

Шимолий Каролинанинг Роли шаҳрида 9-10 ноябрда ўтказилган “Халқаро ясси ер конференцияси”га (FEIC) ернинг яссилигига ишонадиган 400 га яқин одам иштирок этди.

Конференцияда “НАСА ва бошқа космик ёлғонлар”, “Илмий жиҳатдан Ернинг яссилиги”, “Замонавий илмнинг ёлғонларидан уйғониш”, “Ер сайёрасини текшириш” номли мавзуларда ернинг яссилигига доир турли нутқлар ўқилган анжуманга “зиёли синфи" халқни Худодан узоқлаштириш учун ўйлаб топилган синф деб даво қилувчи кўплаб DVD дисклар чиқарган “Kryptoz Media” мезбонлик қилди.

“Youtube”да “Ясси ер” номли канали билан 43 минг обунага эга бўлган ва видеолари орқали ернинг яссилигини исботладим деб даво қилувчи Марк Сарджент нутқида “Ясси ер теорияси илм арбоблари томонидан жиддий равишда кўриб чиқилиши керак бўлган теория” эканлигини таъкидлади.

“Ер сайёрасининг бир муз девори билан ўралган лагандай диск эканлигини” даво қилган иштирокчилар “НАСА ва бошқа илмий тадқиқот институтлари ернинг сохта юмалоқ суратларини тарқатаётганини, ернинг япалоқ эканлиги борасидаги ҳақиқатни одамлардан яшираётганлигини” иддао қилишди.

Кейинги “Халқаро яссиер конференцияси” 2018 йил 15-16 ноябрь кунлари Денверда ўтказилиши маълум қилиниб, анжуманга бир ярим минг иштирокчи келиши кутилаётгани айтилди.

Ўтган февраль ойида ўша вақтда “Cleveland Cavaliers” формасида ўйнаётган NBA юлдузи Кайри Ирвинг: “Ер юмалоқ эмас, кафтдай текис” деб интервью берганди. Ўша интервьюсида “Ер юмалоқ эмас, япалоқ! Одамларни қўрқувда ушлаб туриш учун юмалоқ деб жар солишмоқда. Дўстим, кўп суриштирма. Чунки қанчалик кўп нарсани ўргансанг, яна шунча ўрганадиган нарсалар чиқади. Бу тентаклик. Ер яссими? Ёки юмалоқ бўлиб ўз атрофида айланяптими? Менимча буни аниқлай олмайсиз. Илм-фан ниқоби тагига яширинганлар афтимизга қараб бемалол ёлғон гапиришяпти” деб гапирганди.

Ўтган кунларда эса АҚШлик рэппер B.o.B ернинг ясси эканлигини иддао қилганди. Бу иддаосини исботлаш учун кампания бошлатганини эълон қилганди.

BBC нинг хабарига кўра, ернинг яссилигига ишонганлардан Марк Сарджентнинг “YouTube”даги “Flat Earth”(Ясси ер) каналининг 40 мингдан зиёд обунаси бор. Ораларида “Ясси ер”ни моделлаштирган профессионал кишилар дунёнинг юмалоқлигини “шайтоннинг энг улкан ёлғони” деб баҳолашмоқда.

“Уфқ чизиғига қаранг, у ясси ва теп-текис” деган шиор билан чиққан ушбу гуруҳ ўзларини алданган деб ҳис қилишларини айтишмоқда. Марлин Тид исмли аёл АҚШнинг Шимолий Каролина минтақасидаги конференцияга келиш учун 700 км йўл босганини айтиб фахрланган.