Афғон талабалари Ўзбекистонда

Ўзбек тили ва адабиёти йўналишида таълим оладиган 100 нафар афғонистонлик талаба Ўзбекистонга келди.

21 январь куни 100 нафарга яқин афғонистонлик ёшлар Термиз халқаро аэропортида кутиб олинди. Улар Ўзбекистон президенти Шавкат Мирзиёев ташаббуси билан ташкил этилган Афғонистонлик ёшларни ўқитишга мўлжалланган ўқув марказида таҳсил олиш учун келишди.

Маълумки Афғонистон шимолида 7-8 миллионга яқин ўзбек қондошларимиз истиқомат қилишади. Ўша минтақадан келган ёшлар мазкур марказда икки йил давомида ўзбек тили ва адабиёти йўналишида педагогик таҳсил олишади. Шундан сўнг ўз юртларига қайтиб, соҳалари бўйича афғон ўқувчиларига дарс беришади. Марказда дастлабки босқичда ўзбек тили ва адабиёти бакалавриат таълим йўналишида 97 нафар талаба, шу жумладан, 86 нафар ўғил бола ва 11 нафар қиз болани ўқитиш назарда тутилган.

Ушбу талабаларга машғулотлар олиб бориш учун Тошкент давлат ўзбек тили ва адабиёти ҳамда Термиз давлат университетидан профессор-ўқитувчилар жалб этилган. Бундан ташқари, Тошкент давлат шарқшунослик институти, Ўзбекистон давлат жаҳон тиллари университетидан малакали профессор-ўқитувчилар жалб этилиши ҳам режалаштирилган.

Афғон ватандошларини ўқитишга мўлжалланган ўқув маркази Сурхондарё вилоятининг Термиз туманидаги Янгиариқ қишлоқ хўжалик касб-ҳунар коллежининг бинолари ўрнига ташкил этилган. Бинолар капитал реконструкция қилинган бўлиб, Марказнинг самарали фаолият юритиши ҳамда талабаларнинг билим олишлари учун барча шароитлар муҳайё қилинган.

Маълумотларга кўра, Марказда 750 ўринли ўқув биноси, 180 ўринли фаоллар зали, Ахборот-ресурс маркази, 100 ўринли ошхона, спорт зал ҳамда ҳудуддаги стадион ва спорт майдончалари, 110 талабалар турар-жойи мавжуд бўлиб, улар замонавий кўринишда жиҳозланган. Ушбу ишлар учун 10 миллиард сўмдан ортиқ маблағ сарфланган.