Саудия илк спутник учирди

Саудия Арабистон тезкор ва хавфсиз телекоммуникация хизматини таъминлаш учун илк алоқа спутнигини космосга чиқарди.

Саудия Арабистон расмий хабар агентлиги “SPA” ўлканинг илк алоқа сунъий йўлдоши “SGS1”нинг Гвианадан муваффақият билан космосга чиқарилганини маълум қилди.

Спутникнинг Саудия Арабистон билан бирга тижорий мақсадларда Ўрта Шарқ минтақаси билан Шимолий Африка, Европа, тропик Африка ва Ўрта Осиёнинг катта қисмида хизмат кўрсатиши режалаштирилган.

Юқори тезликда алоқани таъминлайдиган спутник 6,5 тонна оғирликда бўлиб, 20 йилдан ортиқ хизмат кўрсатиши кутилмоқда.

Саудия Арабистон ва АҚШ ҳамкорлигида ясалган сунъий йўлдош қирол Абдулазиз билим ва технология шаҳри билан “Lockhead Martin” ширкати томонидан ишлаб чиқилгани айтилди.