Туркманистон вазири кишанда кечирим сўради

Туркманистоннинг давлат телеканали собиқ савдо ва ташқи иқтисодий алоқалар вазириАрмандурди Ишановнинг коррупция жиноятини бўйнига олганлигини кўрсатди.  Ундан ташқари бир қатор туркман амалдорлари ҳам намойиш этилди. Собиқ вазир эфирда қўлларига кишан тақилган ҳолда кўрсатилди.

У “товар биржаси раҳбари бўлган вақтимда хорижий компаниялар манфаати учун ҳаракат қилиб, уларнинг нефть маҳсулотларини арзон нархларда сотиб олишига имкон бердим. Даромаднинг давлат бюджетига тушиши учун керакли чора-тадбирларни амалга оширмадим. Вазирликни бошқарган вақтимда раҳбарлик лавозимларига қариндошларим ва яқин танишларимни жойлаштирдим. Мен бу жиноий ҳатти-ҳаракатларим билан ўз оиламни шарманда қилдим” деди.  

Эфирда яна бир неча амалдорларнинг шунга ўхшаш иқрорликлари намойиш этилди. Ишанов қамоқ жазосига ҳукм қилинди, лекин қанча муддатга эканлиги номаълумлигича қолди.