Қозоғистонликлар янги автомобилларини онлайн рўйхатдан ўтказишлари мумкин

Автомобиль савдоси келишилгандан кейин автосалон вакили egov.kz  порталида автотранспортни рўйхатдан ўтказиш учун ариза бериши керак.

Аризага керакли ҳужжатларни илова қилиб, автомобиль VIN-кодини ҳамда мижознинг шахсий идентификация рақами (ИИН)ни кўрсатиши керак. Ушбу ариза харидорнинг “Шахсий кабинет”ига келиб тушади.

Харидор ушбу ариза билан ўзнинг шахсий кабинети орқали танишиб, автомобиль учун давлат рақамини танлаши, давлат божини ва рўйхатдан ўтказиш учун тўловни тўлаши керак бўлади. Шундан сўнгра аризага электрон рақамли имзосини қўйиб, уни тасдиқлайди.

Тайёр техпаспорт ва автомобиль рақамини харидор тегишли смс-хабар келганидан кейин махсус ЦОНдан бир иш куни давуомида олиши мумкин. Бундан ташқари, харидор аввалдан расмийлаштирилган ишончнома асосида автосалоннинг ҳужжатлар ва автомобиль рақамини уйга етказиш хизматидан ҳам фойдаланиши мумкин.

Эслатиб ўтамиз, фавқулодда ҳолат вақтида махсус ЦОНлар фақат тайёр ҳужжатларни бериш билан шуғулланади.

Автомобилларни онлайн рўйхатдан ўтказиш Қозоғистонда ишлаб чиқарилган ва Евроосиё иқтисодий иттифоқига кирмайдиган ўлкалардан олиб кирилган автомобиллар учун йўлга қўйилган.