Трампга яна бир суиқасд

АҚШ федерал қидирув бюроси (FBI) Флоридадаги гольф клубида собиқ АҚШ президенти ҳамда президентликка номзод бўлган Дональд Трампга қарши суиқасд бўйича тергов юритаётганлигини маълум қилди.

Уэст Палм Бич шерифи Рик Брадшоу махфий хизмат ходимлари симлар орасидан чиқиб турган қуролни пайқаб қолиб, шубҳали шахс томон қуролдан ўқ узганлигини билдирди.

Трампдан 400-500 метр узоқликда бўлган суиқасдга уринган шахс қуролини ташлаб автомобилида қочишга уринган. Лекин тез орада қўлга олинган. Ушбу ҳодисадан кейин Трамп тарафдорларига “Асло чекинмаслигини” таъкидлаган.

Америка нашрлари қўлга олинган гумонланувчининг 58 йшли Райан Уэсли Раут эканлигини ёзмоқда. Сўнгги йилларда Раут Украинада жанг қилиш учун кўнгиллилардан иборат армия тўплашга уринган. “Х” ижтимоий тармоғида 2022 йил ёзган хабарларида “Украинада жанг қилишга ва ўлишга тайёрлигини” билдирган Раут муваффақиятсиз уринишлари ҳақида электрон китоб ёзди. Китобнинг Эронга бағишланган бир бўлимида “аҳмоқ” президент сайлагани учун айбнинг бир қисми унинг зиммасига тушишини тан олган ҳамда “Бу нотўғри қарор сабабли менга бўлганидек Трампга ҳам суиқасд қилишга ҳақлисиз” деган.