Украина АҚШнинг сайловларни ўтказиш бўйича чақирувини рад этди

Украина президентининг коммуникациялар бўйича маслаҳатчиси Дмитрий Литвин АҚШнинг махсус вакили Кит Келлоггнинг мамлакатда йил охирига қадар сайловларни ўтказиш ҳақидаги чақирувига қарши чиқди.

DW ёзишича, аввалроқ Reuters агентлиги Келлоггнинг интервьюсидан иқтибослар эълон қилган, унда у 2025 йил охиригача Украинада парламент ва президент сайловларини ўтказишга чақирган.

“Биз жаноб Келлоггнинг тўлиқ интервьюсини кўрмадик, фақат сайловлар ҳақидаги бир неча иқтибосларни ўқидик, шунинг учун унинг позициясини тўлиқ баҳолаш қийин. Лекин агар унинг режаси фақат ўт очишни тўхтатиш ва сайловлар ўтказишдан иборат бўлса, бу муваффақиятсиз режадир – Путинни фақат шу икки нарса билан қўрқитиб бўлмайди”, – деб ёзган Литвин.

Унинг сўзларига кўра, Москва "ракеталар ва ўқ-дорилар ишлаб чиқаришни давом эттирмоқда, санкцияларни четлаб ўтишнинг янги усулларини топмоқда ва нефть сотиш орқали даромад олмоқда".

Владимир Зеленский маслаҳатчиси “Аёнки, бу қуроллар қўшни демократик давлатларга ҳурмат билан муносабатда бўлиш учун ишлаб чиқарилмаяпти. Россиянинг Шимолий Корея билан ҳарбий иттифоқ тузиши ҳам ўт очишни тўхтатишга ҳурмат белгиси эмас. Шунинг учун биз асосий ҳамкорлар расмийларидан чуқурроқ ёндашувни кўришни истардик”, – дея қўшимча қилди.

Украинада навбатдаги президентлик сайловлари 2024 йил 31 март куни бўлиб ўтиши керак эди. Олий Рада уларни эълон қилмади, чунки мамлакатда ҳарбий ҳолат жорий этилган. Украина Конституцияси президентлик сайловларини ҳарбий ҳолат пайтида ўтказишни тўғридан-тўғри тақиқламайди, аммо Олий Рада сайловлари учун бундай тақиқ мавжуд. Аммо бу чеклов “Ҳарбий ҳолат ҳуқуқий режими тўғрисида”ги қонун даражасида белгиланган.

Россия президенти Владимир Путин Зеленскийни “бир вақтлар президент бўлган” деб атагани ҳақида хабар берилган. Январь ойининг охирида Россия етакчиси Зеленский билан тинчлик шартномаси имзолашдан бош тортганини билдирган, чунки унинг фикрича, “илгари ўтказилиши керак бўлган сайловлар ўтказилмагани сабабли, у ҳеч қандай ҳужжатни имзолаш ҳуқуқига эга эмас”.

DW маълумотларига кўра, 2 февраль куни бу позицияга Украина ташқи ишлар вазири Андрей Сибига изоҳ берди.

“Путиннинг Украина президентининг легитимлиги борасидаги фикрлари мутлақо аҳмоқона. У Кремлда чорак аср бўлган даврда, Украинада учта президент эркин ва адолатли сайловлар орқали ўзгарди; президент Трамп эса таассуротли ғалабадан кейин иккинчи муддатга қайтди. демократия ва легитимлик дегани мана шу”, – деб ёзди вазир X ижтимоий тармоғида.

Эслатиб ўтамиз, аввалроқ Зеленский АҚШ президенти Дональд Трамп билан учрашувни Москва билан тўғридан-тўғри ёки бошқа шаклда мулоқотни бошлаш шарти деб атаган эди.