Канада, Хитой ва Мексикадан жавоб чоралар

Канада ва Мексика ҳукуматлари АҚШ президенти Дональд Трампнинг импорт божлари ҳақидаги қарорига жавобан Америка товарларига нисбатан дарҳол божхона тўловларини жорий этмоқда.

Канада бош вазири Жастин Трюдо мамлакат АҚШ товарларига нисбатан бож тўловларини жорий этишини маълум қилди.

“Бугун кечқурун мен Канада савдо соҳасидаги АҚШ ҳаракатларига жавобан, Америка маҳсулотларига 155 миллиард доллар миқдоридаги 25 фоизлик бож жорий этишини эълон қиламан”, — деди Трюдо.

У ўз чиқишини америкалик истеъмолчиларга мурожаат билан бошлади:

“Бу сиз, Америка халқи учун реал оқибатларга олиб келади. Биз кескинлашувни хоҳламаймиз, аммо Канада, канадаликлар ва уларнинг иш ўринларини ҳимоя қиламиз”, — деди у. Трюдонинг таъкидлашича, бу озиқ-овқат ва бошқа маҳсулотлар нархининг ўсишига олиб келади.

Ушбу баёнот Трюдонинг Канада провинциялари бош вазирлари ва ҳукумат аъзолари билан учрашувидан сўнг берилди.

Шу билан бирга, Мексика президенти Клаудия Шейнбаум Дональд Трампни “туҳмат”да айблади ва мамлакат ҳам жавоб тариқасида бож тўловларини жорий этишини эълон қилди.

“Биз Оқ уйнинг Мексика ҳукуматига қарши айбловларини – гўёки уюшган жиноий гуруҳлар билан алоқалар борлиги ҳақидаги туҳматларни қатъий рад этамиз. Шунингдек, ҳудудимизга аралашишга қаратилган ҳар қандай уринишларга қарши чиқамиз”, — деди у.

Трампнинг фентанил контрабандасига қарши кураш бўйича талабларини изоҳлар экан, Мексика раҳбари сўнгги тўрт ой ичида 40 тонндан ортиқ наркотик, шу жумладан 20 миллион дозадан зиёд фентанил мусодара қилинганини билдирди. Шейнбаум шунингдек, 10 минг нафар шахс қўлга олинганини маълум қилди.

Президент таъкидлаганидек, Мексика тўқнашувдан қочишни хоҳлайди, аксинча, ҳамкорлик тарафдори.

“Агар АҚШ чинакам наркотик савдоси ва зўравонликка сабаб бўлаётган жиноий гуруҳларга қарши курашмоқчи бўлса, биз биргаликда, интеграциялашган форматда ишлашимиз керак”, — деди Шейнбаум.

Шунингдек, у иқтисодиёт вазирига Мексиканинг манфаатларини ҳимоя қилиш учун тариф ва нотариф чораларни жорий этиш бўйича топшириқ берганини маълум қилди.

Хитой эса Дональд Трамп эълон қилган янги бож тўловларига “қатъий қарши” эканини маълум қилди ва “ҳуқуқ ва манфаатларимизни қатъий ҳимоя қилиш учун мос равишда жавоб чоралари кўрилишини” ваъда қилди.

Хитой Савдо вазирлиги мамлакат АҚШга қарши Жаҳон савдо ташкилотига даъво аризаси топшираётганини маълум қилди. Пекин божларнинг жорий этилишини халқаро савдо қоидаларининг “даражасидан ошиб кетган жиддий бузилиши” деб баҳолади.

“Хитой умид қиладики, АҚШ ички муаммоларини, жумладан, фентанил муаммосини объектив ва ақлли йўл билан ҳал қилади ва ҳар бир имкониятдан фойдаланиб, бошқа давлатларга бож тўловлари орқали таҳдид солишни тўхтатади”, — дейилади вазирлик баёнотида.