Зеленскийдан очиқ таклиф

Украина-Россия уруши бутун шиддати билан давом этмоқда. Украина Президенти Владимир Зеленский урушни дипломатия йўли билан тугатишни хоҳлашларини ва шу йўналишда керак бўлса Россия Президенти Владимир Путин билан учрашишга тайёр эканини маълум қилди.

Зеленский ўзининг Telegram аккаунтида ёзма баёнот бериб, мамлакатда ташриф буюрган Европа тикланиш ва тараққиёт банки (EBRD) раиси Одиль Рено-Бассо билан учрашганини таъкидлади.

Президентлик офисида ўтказилган икки томонлама музокарада, EBRD томонидан Украинада урушдан жабр кўрган одамларга ёрдам кўрсатиш масалалари муҳокама қилинганини билдирган Зеленский “Ёрдамларни кенгайтириш, хусусий секторга тўғридан-тўғри инвестиция киритиш ва банк секторида ҳамкорликни кучайтириш масалалари кўриб чиқилди”, деди.

Зеленский икки томонлама учрашувдан сўнг Одиль Рено-Бассо билан ўтказилган матбуот анжуманида мамлакатда давом этаётган уруш ҳақидаги сўнгги воқеаларни баҳолади.

Урушни тугатиш учун Россия Президенти Путин билан учрашиш имконияти бор-йўқлиги ҳақидаги саволга Зеленский қуйидагича жавоб берди:

“Албатта, ҳам АҚШ, ҳам Президент (Дональд) Трамп ва Европа Иттифоқи давлатлари Россиясиз, Путинсиз дипломатиянинг имконсиз эканлигига ишонади. Шунинг учун мен айтдимки, агар бу урушнинг биз учун қандай якунланиши ҳақида келишиб олсак, мен (Путин билан учрашишга) тайёрман. Дипломатияга тайёрмиз, бу ерда бу борада ҳеч қандай муаммо йўқ. Муаммо шундаки, менга шундай туюляптики, Путин аслида мен билан урушни тугатиш ҳақида гаплашишдан қўрқади.”

Зеленский “Аммо шунга қарамай, Трамп уни урушни тугатишга мажбур қилиши мумкин деб ўйлайман”, деди.

Охирги вақтларда айрим оммавий ахборот воситаларида Россия-Украина урушига барҳам беришга қаратилган “Трампнинг режаси” ҳақидаги маълумотларни эслаб, Зеленский шундай деди:

“Биз жамоаларимиз (АҚШ-Украина) биргаликда ишлашларига ишончимиз комил. Бир-биридан фарқ қиладиган режа бўлиши мумкин эмас.”

Зеленский, урушни тугатиш борасида ўз қарашларини аввал Трамп билан ҳам баҳам кўрганини эслатиб, “Аммо шу билан бирга, буни умумий тушуниш ва умумий қарашга айлантириш учун иш олиб борамиз. Россия нимагадир қарши бўлса ҳам, биз шерикларимиз билан биргаликда умумий стратегияга эга бўлишимиз керак. Кейин эса дипломатияга тайёр бўламиз”, деди.

Трампнинг Украина ва Россия бўйича махсус вакили этиб тайинланган Кит Келлог томонидан урушни тугатишга оид режа ишлаб чиқилгани ҳақидаги хабарларга ҳам тўхталган Зеленский, “Расмий музокаралар ва натижаларни кутамиз”, деди.

EBRD раиси Рено-Бассо эса ўтган йили ажратилган 2,4 миллиард еврони ҳисобга олган ҳолда, уруш бошидан бери Украинага 6,2 миллиард евро миқдорида ёрдам кўрсатганликларини таъкидлади.

Рено-Бассо, Украинада энергетика соҳасида лойиҳалар ишлаб чиқиш ва хусусий секторни қўллаб-қувватлашни давом эттиришларини маълум қилди.