Эпштейн ҳужжатларида Макроннинг исми чиқди

АҚШда вояга етмаган қизларга нисбатан жинсий зўравонлик ва фоҳишалик тармоғини йўлга қўйиш айбловлари билан ҳибсда сақланаётганда қамоқхонада ўлик ҳолда топилган миллиардер Жеффри Эпштейнга оид эълон қилинган янги ҳужжатларда Франция президенти Эммануэль Макроннинг исми ҳам пайдо бўлди. Эпштейн ва Макрон ўртасидаги ёзишмалар ўрин олган ҳужжатлар дунё кун тартибида катта шов-шувга сабаб бўлди. Францияда мухолифат Макроннинг Эпштейн билан алоқаси “Франция миллий хавфсизлигини хавф остига қўйганини” таъкидлаб, тергов очишга чақирди.

АҚШ Адлия вазири ўринбосари Тодд Бланш Эпштейн иши бўйича терговга доир 3 миллиондан ортиқ янги ҳужжатлар жамоатчиликка очиқланганини эълон қилди. Шундан сўнг юз берган воқеалар бутун дунё диққат марказида бўлди. Янги ҳужжатларда исми келтирилган шахслар энг кўп муҳокама қилинадиган мавзуга айланди. Ҳужжатларда Франция президенти Макроннинг исми алоҳида эътибор тортди.

Макроннинг исми у президент этиб сайланган 2017 йилдан олдинги ва кейинги кўплаб ҳужжатларда қайд этилган бўлиб, бу ҳужжатларда Эпштейн Макроннинг кўплаб масалаларда ундан ёрдам сўраганини иддао қилгани кўринади.

Эпштейн 2018 йил 17 сентябрь куни Жаҳон иқтисодий форуми (WEF) раиси ва ижрочи директори (CEO) Борге Брендега юборган, маълумотлар махфий экани таъкидланган электрон хатида қуйидаги ифодаларни ишлатган:

“Макрондан: «Бу қийинчиликларни яхшироқ енгиб ўтиш учун бошқарув, халқаро институтлар, мажбуриятлар ҳамда давлат ва хусусий манфаатдор томонлар ўртасидаги муносабатлар шаклини, шунингдек, ижтимоий-иқтисодий воситаларни қайта ўйлаб чиқишимиз, барпо этишимиз ва ихтиро қилишимиз кераклигига ишонамиз. Янада прогрессив келажакни рағбатлантириш учун қайси ижтимоий-иқтисодий инновацияларни қўллаб-қувватлаган бўлардингиз?»”

Бундан ташқари, Бирлашган Араб Амирликларидан бўлган тадбиркор Султон Аҳмад бин Сулайемнинг 2016 йил 22 мартда Эпштейнга юборган хатида Елисей саройида тушлик қилгани ва ўша пайтдаги иқтисодиёт вазири бўлган Макрон билан “Франциядаги ишлари бўйича яхши суҳбат қурганини” билдиргани ошкор бўлди.

Эпштейннинг 2018 йил 30 августдаги электрон ёзишмасида эса у Макроннинг ўзидан “институтлар, сиёсат ва илм-фан каби деярли ҳар бир мавзуда фикр сўраганини” иддао қилиб, Макрон ҳақида “У Европага етакчилик қилишни истаяпти, балки дунёга”, — деб ёзади.

Франциянинг “Ватанпарварлар” (Patriotes) партияси етакчиси Флориан Филиппо АҚШда жойлашган Х ижтимоий тармоғидаги саҳифасида қилган баёнотида, “Макроннинг президентлик даврида ва ундан олдин Эпштейн билан бевосита ёки билвосита ишбилармонлик алоқаларига” муносабат билдирди.

Филиппо Макроннинг Эпштейн билан боғлиқлиги “Франция миллий хавфсизлигига таҳдид солаётганини” айтиб, тергов ҳаракатларини бошлашга чақирди.