Маск “энг ақлли” Grok 3 сунъий интеллектга очиқ кириш имконини берди

Миллиардер Илон Маск, xAI компаниясининг асосчиси, ўзининг "энг ақлли сунъий интеллекти" Grok 3 га бепул кириш имкониятини очди.

Grok 3 ни ҳозирда X (илгари Twitter) ижтимоий тармоғи орқали тест қилиш мумкин. Premium+ ва SuperGrok обуначилари сунъий интеллектга кенгайтирилган кириш ҳуқуқига эга бўладилар, шунингдек, овозли режим каби янги функцияларни бошқалардан олдин синаб кўриш имкониятига эга бўладилар.

Бундан ташқари, фойдаланувчилар учун қулайлик таъминлаш мақсадида xAI Grok'нинг алоҳида иловасини ишлаб чиққан. Бу илова ҳозирда iOS учун App Store орқали АҚШда юклаб олиш учун мавжуд. Яқин орада Android учун Google Play да ҳам чиқиши кутилмоқда, бироқ аниқ саналар ва ушбу илова қачон ва қайси бошқа мамлакатларда фойдаланиш мумкин бўлиши ҳақида маълумот берилмаган.

Эслатиб ўтамиз, 18 февраль куни Илон Маск Grok 3 ни тақдим этган эди. Ўшанда, xAI нинг янги авлод тил модели ўзининг аввалги версиясига қараганда 10 баробар ақллироқ экани ва рақобатчиларини математика, кодлаш (кодинг) ва фан соҳаларида ортда қолдира олиши ҳақида маълум қилинган эди.

Grok 3 ни ўқитиш учун 200 000 та Nvidia H100 чипига эга улкан суперкомпьютер қўлланилган. У интернетни DeepSearch функцияси билан таҳлил қила олади, Марсга парвоз каби мураккаб ҳисоб-китобларни бажаради ва ҳатто ўйинлар ишлаб чиқиш қобилиятига эга.