Зеленский сайлов қачон бўлишини маълум қилди

Украина президенти Владимир Зеленский мамлакатда президентлик сайлови қачон ўтказилиши ҳақида баёнот берди.

Якшанба куни Киевда ўтказилган матбуот анжуманида у "Президентлик сайлови ҳарбий ҳолат бекор қилинганидан сўнг ўтказилади", – дея таъкидлади. Унинг сўзларини UNIAN Telegram-канали келтиради.

Зеленский шунингдек, АҚШ президенти Дональд Трамп 2025 йилга қадар урушнинг фаол босқичини тугатишга интилаётганини қайд этди.

"Бу – уларнинг (АҚШнинг) мақсади", – деб қўшимча қилди у.

Бундан ташқари, Зеленский Трампнинг уни "диктатор" деб атаганини шахсий ҳақорат сифатида қабул қилмаслигини билдирди.

"Фақат диктаторгина “диктатор” деган сўздан хафа бўлади", – деди у.

Шунингдек, Украина раҳбари тинчлик музокараларида иштирок этиши керак бўлган томонлар ҳақида гапирар экан, Украина, Европа, АҚШ ва Россия музокара жараёнининг асосий иштирокчилари бўлиши кераклигини таъкидлади.

Бундан аввал, матбуот анжумани давомида Зеленский Украинада тинчлик ўрнатиш ёки мамлакатнинг НАТОга аъзо бўлиши эвазига президентлик лавозимини тарк этишга тайёр эканини билдирган эди.

19 феврал куни АҚШ ва Россия ўртасида Саудия Арабистонида ўтказилган музокаралардан сўнг, Трамп Зеленскийни "диктатор" деб атаган эди. АҚШ президентининг сўзларига кўра, "Зеленский президентлик сайловини ўтказишдан бош тортаётгани учун" уни шундай деб атаган.

Бу танқидга Украина ташқи ишлар вазири ва Германия канцлери жавоб қайтариб, Зеленскийнинг президентлик легитимлигига шубҳа йўқлигини таъкидлашди.

Зеленский эса Украинага қўллаб-қувватлов билдирган иттифоқчилар ва барча тарафдорларга миннатдорлик изҳор этди.

Шунингдек, Оқ уй Киевга мурожаат қилиб, Украина расмийларини танқид даражасини пасайтиришга ва нодир металлар бўйича келишувни имзолашга чақиргани ҳақида хабар берилди.