Конгода номаълум касаллик соатлар ичида ўлимга олиб келмоқда

Конгонинг шимолий ғарбида тарқалган номаълум касаллик 50 дан ортиқ инсоннинг умрига зомин бўлди. Шифокорлар ва Жаҳон соғлиқни сақлаш ташкилоти (ЖССТ) мутахассисларига кўра, касаллик жуда тез тарқалмоқда ва унинг белгилари пайдо бўлганидан сўнг бир неча соат ичида ўлим ҳолатлари кузатилмоқда.

Бикоро шифохонасининг тиббий директори Серж Нгалебатонинг таъкидлашича, кўпчилик ҳолатларда илк симптомлар пайдо бўлганидан сўнг 48 соат ичида ўлим қайд этилмоқда. 21 январдан бери ушбу ҳудудда 419 та касалланиш ҳолати аниқланган бўлиб, шундан 53 таси ҳалокатли якунланган.

ЖССТнинг Африка бўйича офиси маълумотига кўра, Болоко шаҳридаги касаллик авж олиши уч нафар боланинг кўршапалакни ейиши билан боғлиқ бўлиши мумкин. 48 соат ичида уларда геморрагик иситма симптомлари пайдо бўлган ва барча тиббий ёрдамларга қарамай, уларни қутқаришнинг иложи бўлмаган.

Ушбу ҳолат яна бир бор ёввойи ҳайвонларни истеъмол қилиш хавфларига эътибор қаратишга мажбур қилди. Мутахассислар бир неча йилдан бери ёввойи ҳайвонлар гўшти орқали одамларга юқиши мумкин бўлган хавфли инфекциялар ҳақида огоҳлантириб келмоқда.

ЖССТнинг 2022 йилда эълон қилган маълумотларига кўра, сўнгги ўн йил ичида Африкада бундай юқумли касалликлар сони 60% га ошган. Бу эса янги эпидемиялар хавфини ортишига сабаб бўлиши мумкин.

9 февраль куни Бомате шаҳрида номаълум касалликнинг иккинчи тўлқини кузатилди. Шу сабабли 13 нафар бемордан олинган таҳлил намуналари мамлакат пойтахти Киншасадаги Миллий биомедицинал тадқиқот институтига юборилди.

Олиб борилган лаборатория таҳлиллари касалликнинг Эбола ёки Марбург вируслари билан боғлиқ эмаслигини кўрсатди. Бироқ, баъзи беморларда безгак (малярия) белгилари аниқланди.

Конгада бунга ўхшаш ҳолатлар аввал ҳам кузатилган. Ўтган йили мамлакатнинг бошқа ҳудудида номаълум гриппга ўхшаш касаллик тарқалиб, ўнлаб инсонлар ҳаётига зомин бўлган эди. Кейинчалик бу ҳолат безгак билан боғлиқлиги аниқланган.