АҚШ Украинага ҳарбий ёрдамни тўхтатди

АҚШ Президенти Дональд Трамп ва Украина раҳбари Владимир Зеленский ўртасидаги баҳсдан сўнг, АҚШ янги қарор қабул қилди. Оқ уй Украинага берилган ҳарбий ёрдамни вақтинча тўхтатганини эълон қилди.

Оқ уй расмийларининг таъкидлашича, ёрдамни тўхтатиш уни бутунлай бекор қилишни англатмайди, балки жараён қайта кўриб чиқилади.

Президент Трамп Оқ уйда журналистларнинг саволларига жавоб берар экан, Украинага ҳарбий ёрдамни тўхтатиш бўйича ҳали аниқ қарор қабул қилинмаганини маълум қилди.

CNN телеканалига маълумот берган Оқ уй расмийларидан бири шундай деди: "Президент тинчликка эътибор қаратаётганини аниқ баён этган. Биз ҳамкорларимизнинг ҳам шу мақсадга содиқ эканини кўришни истаймиз. Шунга кўра, ёрдамни вақтинча тўхтатдик".

Бошқа бир расмийнинг айтишича, бу қарор ҳали Украинага етказилмаган барча ҳарбий техникага тегишли бўлади.

Айрим манбаларга кўра, Трамп жума куни бўлиб ўтган баҳсдан сўнг Зеленскийдан оммавий кечирим сўрашини кутган. Лекин Украина раҳбари бундай қадам ташламагани учун бу ҳолат қарорга таъсир қилган.

Қарор душанба куни кечқурун қабул қилинган бўлиб, унинг Украинага босим ўтказиш стратегиясининг бир қисми экани айтилмоқда.

Шунингдек, АҚШ ва Украина президентлари яқинда Оқ уйда учрашгани маълум. Улар ўртасидаги баҳсдан сўнг Зеленский имзоланиши кутилаётган нодир металлар бўйича шартномани имзоламасдан учрашувни тарк этган.

Бу вазият халқаро ҳамжамият эътиборини тортди. Европа давлатлари Зеленскийни қўллаб-қувватловчи баёнотлар берган. АҚШдан кетган Зеленский Англияга бориб, Европа етакчилари билан учрашган.

Европа давлатлари Украинага қўллов билдирганидан сўнг АҚШнинг ҳарбий ёрдамни тўхтатиш қарори янада кўпроқ қизиқиш уйғотди.