Аргентинада вазият издан чиқди

Аргентинада ишчи касаба уюшмалари, турли нодавлат ташкилотлар ва футбол жамоаси мухлислари қўллаб-қувватлаган ҳукуматга қарши намойишларда 20 киши жароҳатланди, 103 киши қўлга олинди.

Пойтахт Буэнос-Айресдаги Конгресс майдонида тўпланган юзлаб намойишчилар хавфсизлик кучлари билан тўқнашди. Полиция кўздан ёш оқизувчи газ ва сув пуркаш орқали аралашди. Оқибатда 1 нафари оғир бўлган 20 киши жароҳатланди, 103 киши қўлга олинди.

Намойишчилар кўтарган плакат ва транспарантларда, асосан, нафақа тўловлари ва яшаш шароитларини яхшилаш талаби илгари сурилди.

Президент Хавьер Милейнинг иқтисодий сиёсатидан норози бўлган касаба уюшмалари, талаблари қондирилмаса, намойишлар янада кескинлашишини маълум қилди.

Шунингдек, аргентиналик фотомухбир Пабло Грилло намойишларни тасвирга олаётганда бошига газ капсуласи тегиб, оғир жароҳат олгани хабар қилинди. Гриллонинг шифохонада даволаниши давом этмоқда.

Миллий хавфсизлик вазири Патрисия Булрич оммавий ахборот воситаларига берган баёнотида, давлат мулкига зарар етказган намойишчиларга нисбатан қатъий чоралар кўрилишини билдирди.

Ижтимоий тармоқларда тарқалган тасвирларда кўплаб автомобилларнинг ағдарилгани ва давлат мулки вайрон қилингани кўринмоқда.

Аргентинада пенсия ёши аёллар учун 60, эркаклар учун 65 бўлиб, тахминан 7,4 миллион нафақахўр умумий аҳолининг 15,7 фоизини ташкил этади.