Сербия пойтахтида йирик оммавий митинг

Шанба куни Белградда ўн минглаб одамлар йиғилиб, эҳтимол, Сербияда ҳеч қачон ўтказилмаган энг йирик ҳукуматга қарши намойишни ташкил қилди.

Сербия ИИВ баҳолашича, митингда 107 мингга яқин одам иштирок этган. Ёмғир ёғишига қарамай, намойишчилар пойтахт марказини тўлдириб юборган, одамлар ҳаракатланишда қийналган, кўпчилик эса режалаштирилган намойиш жойидан юзлаб метр узоқда қолиб кетган.

Манифестантлар шаҳарнинг турли нуқталаридан бир нечта келишилган майдонларда йиғилишган. Белград хавфсизлик чораларини оширилган ҳолатга ўтказди. Жамоат транспорти ҳаракати тўлиқ тўхтатилган.

Намойишчилар Сербия президенти Александр Вучичнинг истеъфосини талаб қилишди. Давлат раҳбари бу ҳаракатни давлат тўнтаришига уриниш деб баҳолаб, хавфсизлик чораларини кучайтиришга буйруқ берди. Унинг қароргоҳи армия ва махсус кучлар томонидан ўраб олинган.

Сербияда ўтган йил охиридан бери талабалар ва мухолифатнинг намойишлари давом этмоқда. Уларнинг бошланишига 1 ноябр куни Нови-Сад шаҳридаги темир йўл вокзалининг бетон айвони қулаб, 15 киши ҳалок бўлиши сабаб бўлди.

Митингчилар кўплаб олий ўқув юртлари фаолиятини тўхтатиб, йўл ва йўл қўшилиш жойларини тўсиб қўймоқда. Намойишчилар ҳодиса учун ҳукуматдаги коррупция, бепарволик ва қурилишда хавфсизлик қоидаларига амал қилинмаслигини айбдор деб билишмоқда.

Талабалар ва мухолифат гуруҳлари ижтимоий тармоқларда 15 март шанба кунини "D куни" деб эълон қилиб, фаолларни Белграддаги намойишга таклиф қилишди. Бу акцияда бир неча юз минг иштирокчи йиғилиши кутилган.

Сербия ҳукумати эса намойишчиларнинг асосий мақсади ҳукумат ва президентни ағдариш эканини, уларнинг ҳаракатлари ортида Ғарб томонидан молиялаштириладиган ОАВ ва ташкилотлар турганини билдирмоқда. Вучичнинг айтишича, сўнгги тўрт йил ичида чет элдан бу мақсад учун тахминан бир миллиард евро ажратилган.