Кеннеди суиқасдининг ҳужжатлари ошкор қилинди

1963 йилда ўлдирилган АҚШнинг собиқ президенти Жон Ф. Кеннеди суиқасдига оид 80 минг саҳифадан иборат 1123 ҳужжат жамоатчиликка ошкор қилинди. Ҳозиргача эълон қилинган ҳужжатларни ўрганган мутахассислар янги ҳужжатлардан шов-шувли янгиликлар кутмаслик кераклигини таъкидлашди.

Вафотидан 60 йилдан ортиқ вақт ўтган бўлишига қарамай, АҚШ жамоатчилиги орасида ҳали ҳам муҳокама қилинаётган Президент Жон Ф. Кеннеди суиқасдига оид сўнгги ҳужжатлар тўплами эълон қилинди.

АҚШ Миллий Архив ва Ҳужжатлар Идорасининг веб-сайтида берилган баёнотда: "Президент Дональд Трампнинг кўрсатмасига мувофиқ... Президент Жон Ф. Кеннеди суиқасди ҳужжатлари тўпламининг бир қисми бўлган ва аввалроқ махфийлик сабабли сақланган барча ҳужжатлар эълон қилинди" дейилади.

Миллий архивлар 1963 йил ноябрь ойида ўша пайтдаги президент Кеннедига қарши амалга оширилган суиқасдга оид миллионлаб саҳифадан иборат ҳужжатларни ўтган йиллар давомида эълон қилган эди. Аммо минглаб ҳужжатлар Марказий разведка бошқармаси (CIA) ва Федерал қидирув бюроси (FBI) томонидан миллий хавфсизлик хавотирлари туфайли ҳануз махфий сақланиб келган.

80 минг саҳифадан иборат 1123 ҳужжат АҚШ Миллий Архив ва Ҳужжатлар Идорасининг интернет сайти орқали оммага очиқ қилинди.

Аввалроқ суиқасд билан боғлиқ ҳужжатларни таҳлил қилган экспертлар АҚШ оммавий ахборот воситаларига берган баёнотларида, янги эълон қилинган ҳужжатлардан сенсацион маълумотлар чиқиш эҳтимоли жуда кам эканини билдиришган.

АҚШ Президенти Дональд Трамп кеча ушбу ҳужжатларни эълон қилиш режасини маълум қилиб, одамлар буни "ўнлаб йиллардан бери интиқлик билан кутаётганини" айтган эди.

Трамп 23 январь куни собиқ президент Кеннеди суиқасдига оид махфий ҳужжатларни жамоатчиликка очиш тўғрисидаги фармонни имзолаган эди.

Ушбу фармон Кеннеди билан бир қаторда, унинг укаси Роберт Ф. Кеннеди ва Мартин Лютер Кинг суиқасдларига оид барча ҳужжатларни ҳам ошкор этишни кўзда тутади.