Зеленский қазилмалар бўйича келишувдан чиқмоқчи

Украина президенти Владимир Зеленский АҚШ билан фойдали қазилмаларни қазиб олиш бўйича келишувдан чиқишни хоҳламоқда. Бу ҳақда якшанба куни журналистлар билан суҳбатда Оқ уй раҳбари Дональд Трамп маълум қилди.

Трамп Украина раҳбарини мазкур келишувдан воз кечишга уринса, жиддий муаммолар кутишини огоҳлантирди.

Трамп "У камёб металлар бўйича келишувдан воз кечишга ҳаракат қилмоқда, агар у бунга қўл урса, унда муаммолар пайдо бўлади, катта, жуда катта муаммолар", – деди.

Трампнинг айтишича, Зеленский Украинанинг НАТОга аъзо бўлишини хоҳламоқда, аммо бу ҳеч қачон рўй бермаслигини тушунади.

"У НАТО аъзоси бўлишни истайди. Аммо у ҳеч қачон НАТОга аъзо бўлмайди, у буни тушуниб турибди", – деди Оқ уй раҳбари.

Бундан аввал Украина Олий Радаси депутати Ярослав Железняк АҚШ томонидан таклиф этилган янги ресурслар келишуви Украина манфаатларига зид эканини маълум қилган эди. Унинг сўзларига кўра, ҳужжатда Америка Қўшма Штатларининг Украинадаги барча фойдали қазилмалар, жумладан, нефть ва газни бошқаришда муддатсиз иштирок этиши кўзда тутилган бўлиб, Украина хавфсизлигининг кафолатлари ҳақида ҳеч қандай банд йўқ.

Зеленский ўз навбатида Вашингтонни келишув шартларини ўзгартиришда айблади. Шунингдек, у АҚШ томонидан аввал тақдим этилган ҳарбий ёрдамни қарз сифатида тан олишдан бош тортди.