Трампнинг махсус вакили Украинани бўлишни таклиф қилди

АҚШ президенти Дональд Трампнинг махсус вакили Кит Келлог The Times нашрига берган интервьюсида таъкидлашича, Украинада тинчлик келишуви доирасида мамлакатни “Берлин сценарийси” бўйича назорат зоналарига бўлиш мумкин.

Келлогнинг сўзларига кўра, Британия ва Франция қўшинлари Днепр дарёсининг ғарбидаги ҳудудларда жойлашиши, Россия армияси эса шарқдаги оккупация қилинган ҳудудларда қолиши мумкин. Бу икки томон ўртасида украин қўшинлари жойлашган ва демилитаризация қилинган ҳудуд ташкил этилиши таклиф қилинган. Унинг таъкидлашича, англия-француз кучлари Москва учун “ҳеч қандай таҳдид ёки провокация” сифатида қабул қилинмайди.

“Буни Иккинчи жаҳон урушидан сўнг Берлинда юз берган вазиятга ўхшатиш мумкин. Ўшанда ҳам Россия, Франция, Буюк Британия ва АҚШнинг алоҳида назорат зоналари мавжуд эди,” — деди Келлог.

Унинг сўзларига кўра, АҚШ бу ҳудудларга ўзининг ер қўшинларини жойлаштириш ниятида эмас. Шу билан бирга, у Украина шарқидаги мавжуд фронт чизиғи бўйлаб 30 километрли демилитаризация қилинган ҳудуд ташкиллаш мумкинлигини таклиф қилган.

Материалда таъкидланишича, Келлогнинг бу таклифи Киевнинг Россия томонидан оккупация қилинган шарқий ҳудудларидан воз кечишига тўғри келиши мумкинлигини билвосита англатади.

Келлогнинг бу баёноти, мақолага кўра, “Трамп Украина келажагини қандай тасаввур қилаётганига оид энг очиқ ишоралардан бири” бўлиб, “Днепр дарёсининг Украинадаги эҳтимолий демаркация чизиғи сифатида кўрилиши ҳақида юқори даражали АҚШ расмийсидан чиққан биринчи таклиф” сифатида қайд этилган.

Келлог, шунингдек, АҚШ Украинада янги сайловлар ўтказилишини қўллаб-қувватлашини билдирган. Шу билан бирга, у Украина ва унинг иттифоқчиларини Вашингтоннинг узлуксиз ёрдамига умид боғламасликка чақирган.

Интервью нашр этилгандан кейин Келлог ижтимоий тармоқда (X) чиқиш қилиб, The Times унинг сўзларини нотўғри талқин қилганини маълум қилди. Унинг таъкидлашича, у мамлакатни “бўлиш”ни эмас, балки иттифоқчи кучлар (АҚШ қўшинларисиз) жавобгар бўладиган ҳудудлар ҳақида сўз юритган:

“The Times мақоласи менинг сўзларимни нотўғри ёритган. Мен тинчлик ўрнатилгандан сўнг барқарорликни таъминловчи кучлар ҳақида сўз юритдим. Улар Украина суверенитетини қўллаб-қувватлаши керак. Мен тилга олган ‘зоналар’ — АҚШ қўшинларисиз иттифоқчи кучлар жавобгарлигидаги масъулият ҳудудлари бўлиб, бу Украина ҳудудий яхлитлигини бўлишни англатмайди,” — деб тушунтирди у.