Европадан Туркистонга – янги ҳамкорлик эшиклари очилмоқда

Туркистон вилояти ҳокими Нурлан Кушеров Қозоғистондаги 20 га яқин Европа мамлакатлари элчилари билан учрашди.

“Дўстлик уйи”да бўлиб ўтган учрашув давомида Туркистон вилоятининг инвестициявий ва туристик салоҳияти тақдим этилди, ўзаро алоқаларни мустаҳкамлаш ва ҳамкорликни йўлга қўйиш масалалари муҳокама қилинди. Вилоят раҳбари меҳмонларга Туркистоннинг тарихий ва иқтисодий аҳамияти ҳақида сўзлаб берди.

— Туркистон, Буюк Ипак йўли бўйлаб жойлашган ҳолда, мамлакатимизнинг тарихий ва маданий маркази ҳисобланади. Президент Қосим-Жўмарт Тўқаевнинг қўллаб-қувватлаши билан ҳудуд жадал ривожланмоқда. Шаҳарнинг қалби — турк халқларининг маънавий пешвоси Хўжа Аҳмад Яссавий мақбарасидир. Туркистон вилояти савдо-иқтисодий алоқаларни кенгайтириш ва самарали ҳамкорликни ривожлантириш учун катта имкониятларга эга. Аҳолининг зичлиги туфайли бу ерда меҳнат ресурслари етарли. Вилоятда 210 мингдан зиёд кичик ва ўрта бизнес вакиллари фаолият юритмоқда, улар орасида 160 нафар хорижий инвесторлар ҳам бор. Ҳозирги кунда вилоятда 110 га яқин инвестиция лойиҳаси амалга оширилмоқда. 2025–2028 йилларда 19 минг иш ўрни яратиш режалаштирилган. Биз европалик тадбиркорлар билан ҳамкорлик ўрнатишга тайёрмиз, — деди Н.Кушеров.

Учрашув давомида европалик меҳмонлар Туркистонга билдирилган меҳмондўстлик учун миннатдорлик изҳор этиб, ишбилармон алоқаларни йўлга қўйишга тайёр эканликларини билдиришди. Улар Туркистон вилоятининг диққатга сазовор жойлари билан танишар экан, ҳудуднинг бой тарихи ва сайёҳлик салоҳиятига катта қизиқиш билдиришди. Меҳмонлар бу ерда туризмни ривожлантириш учун кенг имкониятлар мавжудлигини таъкидлашди.

Буюк Британия, Польша, Хорватия, Австрия, Болгария, Кипр, Эстония, Германия, Греция, Венгрия, Швейцария, Латвия, Словакия ва бошқа мамлакатлардан келган элчилар Туркистон яқинидаги кичик саноат ҳудудлари ва индустриал зоналарга ҳам ташриф буюриб, уларнинг имкониятлари билан яқиндан танишишди.