Европада электр токи узилди

Испания ва Португалияни қамраб олган кенг кўламли электр узилишлари ҳаётни деярли тўхтатиб қўйди, натижада ўлим ҳолатлари қайд этилди. Генератор газидан заҳарланишлар, шам ёқилиши ортидан юзага келган ёнғинлар ва соғлиқ билан боғлиқ муаммолар туфайли Испанияда камида 7 киши ҳаётдан кўз юмди.

Испания ва қўшни мамлакатларда содир бўлган кенг кўламли электр таъминоти узилишлари нафақат кундалик ҳаётни издан чиқарди, балки ҳалокатли воқеаларга ҳам сабаб бўлди. Расмий маълумотларга кўра, узилишлар билан боғлиқ ҳолда 7 киши вафот этган.

Душанба куни Испания ва Португалия бўйлаб содир бўлган электр узилиши туфайли ҳаво ва темир йўл қатновлари тўхтади, мобил алоқа тизимлари ишдан чиқди. Банкоматлар ва электрон тўлов инфратузилмалари ҳам фаолиятини тўхтатди. Франциянинг айрим ҳудудларида ҳам қисқа муддатли электр узилишлари кузатилди.

Испания Сивил Гвардияси берган маълумотга кўра, Галисиянинг Табоадела шаҳарчасида 81 ва 77 ёшли жуфтлик ҳамда уларнинг 56 ёшли ўғли уйларида ҳалок ҳолда топилган. Илк тахминларга кўра, улар уй ташқарисига ўрнатилган генератордан чиққан углерод оксиди газидан заҳарланган бўлиши мумкин. Ҳалок бўлганлардан бири нафас олиш билан боғлиқ хасталикка чалинган бўлгани маълум қилинди.

Мадриднинг Карабанчел туманида электр ўчиши пайтида ёқилган шам туфайли ёнғин юз берган. Воқеа натижасида 52 ёшли бир киши ҳалок бўлди, яна 13 киши туман таъсирида қолди.

Галисиянинг Феррол шаҳрида турли соғлиқ муаммоларига эга бўлган 59 ёшли эркак, Бетанзос шаҳрида 80 ёшли бир киши ва Думбрияда 86 ёшли бошқа бир киши ҳаётдан кўз юмди.

Ҳокимият органлари электр узилишлари билан боғлиқ ўлим ҳолатлари юзасидан тергов бошланганини маълум қилди. Электр таъминоти узилишининг аниқ сабаблари бўйича ҳозирча расмий баёнот берилмади.