Юртига қайтганга 1000 доллар!

АҚШ президенти Дональд Трамп ноқонуний муҳожирларга нисбатан қизиқарли тўлов режасини эълон қилди. Трамп, ўз ихтиёри билан мамлакатдан чиқиб кетадиган ҳар бир муҳожирга 1000 доллар берилишини маълум қилди.

The Economic Times нашрининг ёзишича, АҚШ Ички Хавфсизлик Вазирлиги бу ташаббус орқали ҳар бир муҳожир оиласига тўғри келадиган солиқ тўловчилар харажатидан 1 миллион долларгача тежаш мумкинлигини билдирган.

Ички Хавфсизлик Вазирлиги, шунингдек, сафар ёрдами ҳам таклиф қилишини ва “CBP Home” иловаси орқали ўз юртига қайтиш нияти борлигини билдирган шахслар ушланиш учун устуворлик рўйхатидан чиқарилишини маълум қилган.

Трамп муҳожирлик сиёсасини ўз сайлов кампаниясининг асосий элементига айлантирган.

Бироқ, бу жараён анча қиммат ва ресурс талаб қилувчи амалиёт эканлиги таъкидланмоқда.

New York Postнинг ёзишича, агар муҳожирлар Трамп маъмурияти таклиф этаётган “CBP Home” иловаси орқали ихтиёрий қайтиш режасини тузиб, бу ҳақда хабар берса, федерал муҳожирлик идоралари уларни ушлашдан воз кечиши мумкин. Ички Хавфсизлик Вазирлиги бу шахсларнинг тижорат парвозларига кетадиган харажатларни қоплаб беради ва мамлакатни тарк этганликлари тасдиқлангандан сўнг тўлов амалга оширилади.

Ҳукумат ихтиёрий қайтиш учун тўлов қилса-да, Ички Хавфсизлик Вазирлиги солиқ тўловчилар учун харажатлар 70% гача камайишини тахмин қилмоқда. Сабаби, бир ноқонуний муҳожирни қўлга олиш, қамоққа олиш ва мамлакатдан чиқаришнинг ўртача баҳоси 17 121 долларни ташкил этади.

Трампнинг бош маслаҳатчиси Стивен Миллер X (собиқ Twitter) орқали қилган баёнотида: “Узоқ муддатли ижтимоий ёрдам ва давлат дастаклари инобатга олинса, ҳар бир ноқонуний муҳожир оиласи учун тежам 1 миллион долларгача етиши мумкин”, — деди.

Ички Хавфсизлик Вазирлиги раҳбари Кристи Ноем эса шундай деди: “Ихтиёрий чиқиб кетиш — ноқонуний муҳожирлар учун қўлга тушмасдан чиқишнинг энг хавфсиз ва иқтисодий йўлидир”. Шу билан бирга у, “CBP Home” иловасини зудлик билан юклаб олинг ва ихтиёрий равишда юртингизга қайтинг", деб чақириқ қилди.