Жанубий Кореяда қурилаётган метро вайрон бўлди

Жанубий Кореянинг Сеул шаҳрининг жанубида жойлашган Кванмён шаҳрида метро қурилиш майдонида ҳалокат содир бўлди. Ҳозирда ишчилардан бири ҳалигача топилмаган.

Синансан метро йўналиши қурилаётган майдонда жума куни соат 15:13 да ер чўкиши юз берди. Оқибатда ер устидаги йўлнинг бир қисми чўкиб тушди ва бир неча бино зарар кўрди.

Аввал бошда беш нафар ишчи билан алоқа узилган эди. Кейинчалик уларнинг уч нафари тирик ҳолда топилди, яна бири — 20 ёшли экскаватор ҳайдовчиси — 13 соат ўтгач, ер остидаги тахминан 30 метр чуқурликдан қутқариб олинди.

Ҳозирда тахминан 50 ёшдаги бешинчи ишчини қидириш ишлари давом этмоқда. Қутқарув ишларига еттита қидирув-қутқарув ити ва махсус ускуналар жалб этилган.

Полиция ва қутқарувчилар ҳозирча йўқолган ишчининг аниқ жойлашувини, ҳатто унинг мобил телефони орқали ҳам, аниқлай олмаяпти. Синоптиклар Кванмён шаҳрида кучли ёмғир ёғишини башорат қилмоқда. Шу сабабли қутқарув ишларини қисқа фурсатда якунлаш зарур.

Метро қурилишидаги ҳалокатдан сўнг тахминан 2 400 нафар маҳаллий аҳоли эвакуация қилинди. Хавфсизлик текширувларидан кейин, тун ярмида эвакуация буйруғи бекор қилинди. Паноҳгоҳларда тунган 220 киши ўз уйларига қайтди.

Эслатиб ўтамиз, шу йил февраль ойида ҳам Жанубий Кореяда кўприк вайрон бўлган эди. Сеул – Седжон тезюрар автомагистрасида қурилиш пайтида кран ёрдамида устунлар орасига темир конструкция кўчирилаётган вақтда ҳалокат содир бўлган. Оқибатда саккиз нафар ишчидан уч нафари ҳалок бўлган, беш нафари жароҳат олган.