АҚШлик кардинал Роберт Франсис Превост янги Папа этиб сайланди

Ватикандаги Систина капелласи морисида янги Папа сайланганини англатувчи оқ тутун кўтарилди. Янги Папа АҚШлик кардинал Роберт Франсис Превост бўлди. Превост тарихдаги илк АҚШлик Папа сифатида қайд этилди.

Католикларнинг янги Папаси 69 ёшли АҚШлик кардинал Роберт Превост сайланди. Чикаголик Превост тарихда илк бор АҚШдан танланган Папа бўлди. Ватикандаги Папа сайловида Систина капелласи морисида оқ тутун кўтарилиши билан янги Папа белгилангани эълон қилинди.

Янги Папа “Лео XIV” исмини қабул қилди ва Католик оламининг 267-руҳий етакчиси сифатида эълон қилинди.

Майдонда йиғилган минглаб одамлар хурсандчилик билан уни қарши олдилар. Балконга чиққан Папа Лео XIV “Тинчлик сизлар билан бўлсин” деди. Илк нутқида у бирлик ва тинчлик ҳақидаги фикрларини билдирди. “Инсонлар ҳар доим тинчликда яшайдиган ягона халқ бўлиши керак, деб ишонаман”, деди Папа Лео XIV ва катта қарсаклар билан қарши олинди. Шунингдек, у ўз нутқида ўзидан аввалги Папа Франсисга махсус миннатдорлик билдирди: “Папа Франсисга раҳмат”, деди у.

Превост узоқ йиллар давомида Перуда миссионер сифатида фаолият юритган ва шу давр мобайнида Перу ватандошлигини ҳам қабул қилган. Жамоатчилик назарида у марказчи шахс сифатида танилган бўлса-да, ижтимоий адолат, муҳожирлар ҳуқуқлари ва камбағалларни ҳимоя қилиш борасида илғор позицияга эга. Бироқ, аёлларни дьякон этиб тайинлашга қарши бўлгани боис, у черков таълимоти борасида мутаассиб (консерватив) деб баҳоланади.

2012 йили The New York Times нашрида чоп этилган мақолага кўра, Превост “гомосексуал турмуш тарзи” ҳамда “гомосексуал жуфтликлар ва уларнинг фарзандликка олган болалари” тўғрисидаги танқидий баёнотлари билан эътироф этилган.

АҚШ президенти Дональд Трамп, Америка Қўшма Штатларидан сайланган илк Папа — янги Папа Лео XIV сайланишини мамлакат учун “катта шараф” деб атади.