Трамп Эрдўғондан музокараларда воситачи бўлишни сўради

АҚШ президенти Дональд Трамп Туркия президенти Ражаб Тоййиб Эрдўғондан Россия ва Украина ўртасидаги урушни тўхтатиш бўйича музокараларда воситачи бўлишни сўради.

Трамп Эрдўғоннинг ҳам Россия президенти Владимир Путин, ҳам Украина раҳбари Владимир Зеленский билан музокаралар олиб бориш имкониятига эгалигини таъкидлади.

Маълумотларга кўра, президент Эрдўғон ҳам воситачилик таклифига ижобий муносабат билдирган.

Ўз навбатида, Туркия президенти Эрдўғон Трампдан АҚШ Ғазодаги ўт очишни тўхтатишга кўмаклашишини сўради. Эрдўғон Исроил ҳужумлари Сурия хавфсизлиги ва барқарорлигига таҳдид солаётганини билдирди.

Аввалроқ, Туркия президенти Россия ва Украина ўртасидаги можарони ҳал этишда аллақачон воситачилик қилган.

Эслатиб ўтамиз, 2022 йил июль ойида Туркия ва БМТ воситачилигида Украина, Россия ва БМТ ўртасида келишув имзоланган эди. Бу келишув Украинага Қора денгиз орқали “дон коридори” деб номланган йўл орқали тахминан 33 миллион тонна донни хавфсиз экспорт қилиш имконини берди. Бироқ 2023 йил июль ойида Россия ушбу келишувдан чиқиб, унинг талаблари бажарилмаганини маълум қилди.

Жорий йил март ойида Эрдўғон Туркия Украинадаги можарони барқарор ҳал этиш учун музокара жараёнига мезбонлик қилишга тайёр эканини билдирган эди. Туркия раҳбари ўшанда Анқара можаро бошланганидан буён адолатли ва барқарор тинчликка интилиб келаётганини ва бу позицияга содиқ қолишини таъкидлаган эди.

Шунингдек, куни кеча АҚШ президенти Дональд Трампнинг Украина бўйича махсус вакили Кит Келлог маълум қилишича, Украина АҚШ томонидан таклиф этилган кенг қамровли тиничлик келишувига рози бўлган. Унинг сўзларига кўра, томонлар “яқин” вақт ичида урушни тўхтатиш бўйича келишувга етиб бориши мумкин.

Келлог, шунингдек, Украина ва Россия томонидан назорат қилинадиган 30 километрлик жангсиз ҳудуд ташкиллаш режаси ҳақида гапирди. Унга кўра, ҳал қилувчи омил 30 кунлик ўт очишни тўхтатиш бўлади.