G7 саммитида Украина бўйича ягона баёнот қабул қилинмади

Украина президенти Владимир Зеленский Канадада ўтаётган G7 саммитини муддатидан олдин тарк этди. Бу қарор Россиянинг Киевга қилган сўнгги ҳужумлари ва АҚШ президенти Дональд Трампнинг саммитдаги иштироки тўхтагани билан боғлиқ.

Саммит иштирокчилари Украинага қўшимча ёрдам кўрсатиш ниятида эканини билдирган бўлсалар-да, уруш бўйича ягона расмий баёнот қабул қилинмади. Бу АҚШнинг қаттиқ баёнотларга қарши бўлган позицияси билан изоҳланди — уларнинг фикрича, бундай муросасиз баёнотлар Владимир Путин билан келгуси музокараларга салбий таъсир кўрсатиши мумкин.

Украин делегацияси, хусусан Зеленский, Дональд Трамп билан режалаштирилган учрашувнинг амалга ошмай қолганидан норози эканини билдирди. Зеленский саммитни Украина учун АҚШдан ҳарбий ёрдам олиш ва Трампга босим ўтказиш учун муҳим имконият деб баҳолаган эди.

Шунингдек, Зеленский АҚШдан 30–50 миллиард доллар қийматидаги ҳаво мудофаа тизимлари ва қурол-яроғ етказиб бериш бўйича келишувларга эришишга ҳаракат қилган.

Украина раҳбарияти Россия нефти нархига чекловни 60 доллардан 45 долларга туширишни ҳам таклиф этган. Бу орқали Россиянинг энергетикадан келадиган даромадини камайтириш ният қилинган.

Европа Иттифоқи 18-пакет санкциялар устида иш олиб бормоқда. Унга кўра, учинчи давлатлар орқали қайта ишланган ва Европага экспорт қилинган Россия нефтини тақиқлаш режалаштирилмоқда. Шу билан бирга, мамлакатлар Россия нефтидан воз кечиш режаларини очиқ эълон қилишлари талаб этилади.

G7 саммитида Дональд Трамп янги санкциялар киритишга қаршилигини билдириб, "Аввало Европа ҳаракат қилиши керак", деган ва бу каби санкциялар АҚШ учун катта харажатларга олиб келаётганини таъкидлаган.

16 июнь куни Трамп Канададаги саммитни тарк этиб, АҚШга қайтган. Расмий маълумотларга кўра, бу қарор Яқин Шарқдаги вазиятнинг кескинлашгани билан боғлиқ бўлган. 17 июн куни Трампнинг Зеленский билан учрашуви режалаштирилган эди.