Россиядан Киевга ракеталар ёмғири

Россия-Украина уруши бутун шафқатсизлиги билан давом этмоқда. 31 июль кечаси Россия армияси томонидан Украина пойтахти Киевга ўнлаб ракеталар ва дронлар билан ҳужум уюштирилди. Ҳужум натижасида кўплаб одам ҳалок бўлди ва жароҳатланди. Бу ҳужум Россия томонидан Киевда болалар энг кўп зарар кўрган ҳодиса сифатида қайд этилди.

Кеча уюштирилган ҳужумда, жумладан 6 ёшли бола ҳам бўлган камида 13 киши ҳалок бўлди, 132 киши жароҳатланди. Украина Фавқулодда вазиятлар хизмати маълумотига кўра, жароҳатланганлар орасида 5 ойлик чақалоқ ҳам бўлган 14 нафар бола бор.

Киев ҳарбий маъмурияти раҳбари Тимур Ткаченконинг билдиришича, ҳужум оқибатида тўққиз қаватли тураржой биносининг катта қисми вайрон бўлган, вайрона остида қолганлар қидирилмоқда. Энг кучли зарар Соломянский ва Святушинский туманларида қайд этилган. Киев бўйлаб камида 27 нуқтада ҳужумлар қайд этилган бўлиб, 100 дан ортиқ тураржой, мактаб, шифохона ва университетга зарар етган.

Украина ҳаво кучлари маълумотига кўра, кеча давомида Россия томонидан 309 та «Шахед» туркумидаги ва чалғитувчи дронлар, ҳамда саккизта «Искандер-К» қанотли ракета отилган. Украина мудофаа тизими 288 дрон ва учта ракетани йўқ қилган, аммо 5 ракета ва 21 дрон ўз нишонига етиб борган.

Шу кечаси, Шарқий Украинадаги Краматорск шаҳрида тураржой бинога қилинган ҳужумда бир киши ҳалок бўлган, камида 11 киши жароҳатланган. Донецк вилояти ҳарбий маъмурияти раҳбари Вадим Филашкиннинг маълум қилишича, беш қаватли бино ҳужум нишонига айланган.

Россия Мудофаа вазирлиги эса ўша кечаси Украина томонидан учирилган 32 та дронни уриб туширганини билдирди. Шунингдек, Россиянинг Пенза вилоятида саноат объектига қилинган дрон ҳужуми оқибатида ёнғин чиққан, Волгоградда эса темир йўл инфратузилмасига дрон парчалари тушиб, поезд қатнови тўхтатилган.

Россия Мудофаа вазирлиги маълум қилишича, Донецк вилоятида жойлашган стратегик аҳамиятга эга Часив Яр шаҳри тўлиқ Россия қўшинлари назоратига ўтган. Аммо Украина армияси вакили Виктор Трегубов бу маълумотни инкор этиб:

«Бу фақат ёлғон пропаганда. Вазиятда ҳеч қандай ўзгариш йўқ», — деди.

Украина Генштаби ҳам худди шу куни эълон қилган ҳисоботида Часив Яр атрофида сўнгги 24 соат ичида еттита жанг бўлганини, шаҳарнинг катта қисми Россия назоратида экани акс этган харита маълумотларига асосланганини билдирган. Шу билан бирга, DeepState манбасининг очиқ харитасида шаҳарнинг жанубий ва ғарбий туманлари ҳали ҳам бетараф «чегараси аниқланмаган ҳудуд» деб кўрсатилган.

Украина Президенти Владимир Зеленский ҳужумдан сўнг қилган чиқишида Киевга бундай кучли ҳужум Россиянинг тинчлик даъволарига берган жавобидир, деб таъкидлади:

«Бугун дунё, Америка ва Европага қаратилган тинчлик истагимизга Россиянинг жавобини яна бир бор кўрди: янги ва қўрқув солувчи қотилликлар. Шундай экан, кучсиз тинчлик имконсиз».

Зеленский, шунингдек, Украина иттифоқчиларини мудофаа ваъдаларини бажаришга ва Москвага ҳақиқий музокаралар учун босим ўтказишга чақирди.

АҚШ Президенти Доналд Трамп эса 29 июль куни қилган баёнотида Россия Президенти Владимир Путинга Украинадаги тинчлик музокараларида силжишга эришиш учун 8 августгача муҳлат берганини, акс ҳолда оғир санкциялар ва бож ставкалари жорий этилишини айтган. Ғарб етакчилари эса Путинни янада кўпроқ ҳудуд эгаллаш мақсадида музокараларни чўзишда айбламоқда.