АҚШда Трамп тарафдори Чарли Киркка суиқасд

АҚШнинг Юта штатидаги Utah Valley Университетида ўтказилган тадбирда, Президент Дональд Трампга яқин шахслардан бири бўлган ўнгчи фаол Чарли Киркка суиқасд қилинди.

Трампнинг айтишича, фаол Чарли Кирк бўйнидан ўқ еб, ҳаётдан кўз юмган. Президент Трамп Кирк хотираси учун мамлакатдаги барча байроқларни якшанба куни соат 18:00гача ярим туширишни буюрди.

Маълумотларга кўра, Чарли Кирк университетда очиқ майдонда нутқ сўзлаётганда, қаердан келгани номаълум ўқ унинг бўйнига тегди. Университет матбуот котиби Киркнинг бўйнидан яралганини тасдиқлади. Хавфсизлик хизматчилари уни шифохонага олиб боришган, лекин жарроҳлик амалиётига қарамасдан, Кирк вафот этди.

Фаолнинг ўлими ҳақидаги хабарни ҳам айнан Президент Трамп эълон қилди.

ФБР директори Каш Пател ижтимоий тармоқдаги чиқишида суиқасд қилган шахс қўлга олинганини маълум қилди. Кейинроқ эса у сўроқдан сўнг озод қилингани, тергов давом этаётганини билдирди.

Президент Трамп видео мурожаатда:

«Чарли Кирк суиқасди сабабли жуда ғамгин ва ғазабдаман. Бугун Америка учун қора кун», — деди. Шунингдек, Кирк миллионлаб ёш америкаликка илҳом манбаи бўлганини таъкидлади.

Трамп Киркни «катта ватанпарвар» сифатида таърифлаб, бутун АҚШ халқига таъзия билдирди.

Чарли Кирк — университет талаба-ёшлари орасида консерватив ғояларни тарғиб қилиш мақсадида тузилган Turning Point USA ташкилотининг асосчиси эди. Унинг ижтимоий тармоқларда катта аудиторияси бор эди:

X (собиқ Twitter) — 5,2 млн кузатувчи,

TikTok — 7,3 млн кузатувчи.

1993 йилда туғилган Кирк, 18 ёшидаёқ Turning Point USA’ни ташкил қилган. Телевидение чиқишлари, подкастлари ва ижтимоий тармоқдаги постлари орқали кўп бор баҳсли мавзулар билан кун тартибига чиққан. У кўпинча:

муҳожирлар масаласи,

қурол олиб юриш ҳуқуқи,

оила қадриятлари ҳақида қаттиқ ва тортишувли фикрлар билдирган.

Бир тадбирда у:

«Қуролга эгалик қилиш ҳуқуқ эмас, балки асосий ҳуқуқ. Ҳукумат бу ҳаққа тўсқинлик қилмаслиги керак», — деган эди.

Кирк 2016 йилги президентлик сайловларидан бери Дональд Трампнинг асосий ёрдамчилари ва тарафдорларидан бири бўлиб келган. Унинг фаолияти орқали Трамп айниқса ёш сайловчилар орасида таъсирини мустаҳкамлади.

Кирк АҚШдаги кўплаб консерватив доиралар каби Исроилни қаттиқ қўллаб-қувватлаб келган. У кўп марта:

«Исроил — АҚШнинг энг яқин иттифоқчиси»,

«Фаластин тарихи йўқ, бу ерлар яҳудийларнинг аждодий замини» деб таъкидлаган.

Исроил Бош вазири Биньямин Нетаньяху Киркнинг ўлими ҳақидаги хабардан сўнг шундай ёзди:

«Чарли Кирк ҳақиқатни айтгани ва эркинликни ҳимоя қилгани учун ўлдирилди. У Исроилнинг шердил дўсти эди. Фақат икки ҳафта аввал у билан гаплашдим ва уни Исроилга таклиф қилган эдим. Энди бу сафар амалга ошмайди. Биз буюк инсонни йўқотдик.»

Нетаньяху шунингдек, Киркнинг Америкага бўлган муҳаббати ва сўз эркинлигига бўлган ишончи абадий хотирада қолишини қайд этди.

Трамп Truth Social тармоғида ҳам Кирк ҳақида ёзиб, унинг ўлимига қаттиқ афсус билдирди:

«Ҳаммамиз Чарли Кирк учун дуо қилишимиз керак. У тубдан ажойиб инсон эди. Худо уни асрасин.»