ФБРнинг собиқ директорига айблов қўйилди

Виржиния штатидаги федерал ҳайъати ФБРнинг собиқ директори Жеймс Комига айблов эълон қилди.

NBC News хабар беришича, айблов хулосаси икки моддадан иборат: ёлғон кўрсатма бериш ва Конгресс ишига тўсқинлик қилиш.

АҚШ Бош прокурори Пэм Бонди ижтимоий тармоқ X орқали номини тилга олмасдан ёзганида, айблов “Адлия вазирлигининг ҳокимиятини суиистеъмол қилган ва Америка халқига ёлғон маълумот берган шахсларни жавобгарликка тортишга бўлган қатъийлигини акс эттиради”, деди.

Унинг қўшимча қилишича: “Биз бу ишда фактларга амал қиламиз”.

АҚШ президенти Дональд Трамп эса Truth Social тармоғида Комига айблов қўйилганини қуйидагича изоҳлади:

“Америкада адолат! Бу мамлакат дуч келган энг ёмон одамлардан бири, ФБРнинг собиқ бузуқ раҳбари Жеймс Коми. Бугун катта ҳайъат унга турли ноқонуний ва қонунбузарлик ҳаракатлари учун икки жиноят моддаси бўйича айблов қўйди”.

Трампнинг таъкидлашича, Коми узоқ йиллар давомида мамлакатга зарар етказган ва эндигина уни миллатга қарши қилган жиноятлари учун жавобгарликка тортиш жараёни бошланмоқда.

Айбловлар Комининг 2020 йил 30 сентябрда Сенатнинг адлия масалалари қўмитасидаги эшитувларда берган кўрсатмалари билан боғлиқ. У 2017 йилги кўрсатмаларини тасдиқлаган ва Дональд Трамп ҳамда собиқ давлат котиби Ҳиллари Клинтонга оид ФБР терговлари ҳақида маълумот тарқатилишига рухсат бермаганини айтган.

Бироқ Комининг ўринбосари Эндрю Маккейб адлия вазирлиги инспектори тайёрлаган 2018 йилги ҳисоботга кўра, Коми унга маълумотни оммавий ахборот воситаларига узатишга рухсат берганини билдирган. Шунингдек, ўша ҳисоботда Маккейбнинг бир неча марта ёлғон ёки адаштирувчи баёнот бергани қайд этилган.

Телеканал маълумотича, агар ФБРнинг собиқ раҳбари айбдор деб топилса, унга беш йилгача озодликдан маҳрум этиш жазоси тайинланиши мумкин.

Аввалроқ хабар қилинганидек, Коми Трампга таҳдид қилганликда ҳам айбланган. Бу ҳолатга Instagram’даги бир нашр сабаб бўлган. ОАВ шу вақтда Трамп ва Коми ўртасидаги кўп йиллик можарони эсга солган: Трамп президентликнинг биринчи муддатида Комини ФБРдан ишдан бўшатган эди.