Нобел мукофоти соҳиби Адольфо Пересдан чақириқ

Нобел тинчлик мукофоти соҳиби Адольфо Перес ўз мамлакати Аргентинада «Ғазо қассоби» деб аталган Исроил бош вазири Биньямин Нетаньяҳу ташриф буюрса, уни ҳибсга олиш учун судга мурожаат қилди.

Аргентиналик Нобел тинчлик мукофоти соҳиби Адольфо Перес Эсквивел ва инсон ҳуқуқлари ташкилотлари мамлакатга режалаштирилаётган ташриф арафасида федерал судга мурожаат қилиб, Халқаро жиноят суди (ХЖС) қарорларини ижро этиш ва Исроил бош вазири Биньямин Нетаньяҳуни геноцид ва ҳарбий жиноятлар учун ушлашни талаб қилди.

93 ёшли Переснинг таъкидлашича, Исроилнинг ҳужумлари натижасида 20 минг бола ҳаётдан кўз юмган, Ғазоликлар эса Исроил аскарлари томонидан атайлаб нишонга олинган. У Аргентинанинг ХЖС юрисдикциясини тан олишини ва унинг қарорларини бажаришга мажбур эканини эслатди.

Президент Хавьер Милей ва ҳукуматини танқид қилган Перес шундай деди:

«Нетаньяху Президент Милейнинг таклифи билан бу ерга келмоқчи. Агар келса, албатта, қарши чиқамиз ва умид қиламизки, у мамлакатимизга келмайди. Агар келса-чи? Бу эҳтимолдан холи эмас, чунки Аргентина ҳукумати Нетаньяҳу ташриф буюрганда ХЖС қарорларини бажармаслигини айтди. Ҳолбуки, бу масалада ХЖСнинг позицияси аллақачон аниқ».

Перес, Милейнинг Исроил ва АҚШ билан яқин иттифоқчиликда экани демократия нуқтаи назаридан ижобий ҳолат эмаслигини таъкидлади.

АҚШнинг позициясини танқид қилган Нобел мукофоти соҳиб Перес қўшимча қилди:

«Ироққа босқинни легаллаштириш учун ёлғонлар тўқишди. Мен уруш пайтида 12 кун Бағдодда бўлдим, у ердаги вайронагарчиликни, талончиликни, музейлардаги ўғирликларни ўз кўзларим билан кўрдим. Болалар шифохонасида кўрганларимиз эса жуда оғир эди. Халқаро дори-дармон ёрдами етиб бормаётган, электр ҳам йўқ эди. Бу тажрибалар бизга бу аҳвол давом этиши мумкин эмаслигини кўрсатди. Бугун АҚШ БМТдаги вето ҳуқуқидан фойдаланиб, Исроилни қўллаб-қувватламоқда, бу эса ечим олдидаги энг катта тўсиққа айланди».

Переснинг таъкидлашича, Исроил тарихан ҳеч қачон Фаластин давлатининг тузилишига рози бўлмаган. У қўшимча қилди:

“Дунёда яҳудий жамоаси кучли, айниқса, АҚШда улар ўз қарорларини мажбурий қилиб қабул қилдиришади. Шу боис Фаластин давлатининг тузилишига йўл қўймасликка ҳаракат қилишмоқда ва уларнинг ерларини аста-секин тортиб олишмоқда. Бугун БМТ АҚШнинг босимлари туфайли анча заиф ҳолатга тушиб қолди. БМТ ўзини ислоҳ қилиши ва демократиялашиши шарт. Тинчлик учун ташкил этилган БМТ бугунги кунда умидсизлик манбаига айланди ва бу ҳолат жуда хавфли».

Адольфо Переснинг таъкидлашича, Ғазодаги инсонлар фақат оғир яраланиш ва қуролдан эмас, балки очликдан ҳам ҳалок бўлмоқда. Шу боис озиқ-овқат олиб киришга уринаётган «Кўп миллатли Сумуд флоти»нинг миссияси жуда муҳим аҳамиятга эга.