Исроил Бош вазири Қатардан узр сўради

Исроил Бош вазири Биньямин Нетаньяху 9 сентябр куни Дохага қилинган ҳаво ҳужумлари учун Қатар Бош вазири Муҳаммад бин Абдурраҳмон Ол Сонийдан расман узр сўради. Бу ҳақда Исроил телевидениесининг 12-канали хабар қилди.

Маълумотга кўра, Нетаньяху 29 сентябр, душанба куни АҚШ президенти Дональд Трамп билан учрашуви пайтида Ол Сонийга қўнғироқ қилган. Суҳбат Оқ уй раҳбари иштирокида бўлиб ўтган.

Исроил Бош вазири зарба вақтида ҳалок бўлган Қатар хавфсизлик тузилмалари офицерининг оиласига товон тўлашни ваъда қилди ҳамда, Оқ уй матбуот хизмати хабар беришича, “Исроил келгусида бундай ҳужумларни амалга оширмаслиги”ни маълум қилган.

АҚШ баёнотида айтилишича, Қатар Бош вазири Нетаньяхунинг кафолатларини “олқишлаб қабул қилган” ва Қатарнинг минтақавий хавфсизлик ва барқарорликка муносиб ҳисса қўшишга тайёрлигини таъкидлаган.

Ўз навбатида, Трамп, матбуот хизматига кўра, “Исроил-Қатар муносабатларини кўп йиллик ўзаро гина ва тушунмовчиликлардан кейин ижобий даражага олиб чиқиш истагини” билдирган.

Уч томонлама суҳбатда Нетаньяху ва Ол Соний “координация ва мулоқотни яхшилаш, ўзаро даъволарни ҳал қилиш ҳамда таҳдидларнинг олдини олиш бўйича биргаликдаги саъй-ҳаракатларни кучайтириш учун уч томонлама механизм тузиш” таклифини қабул қилган.

“Трамп ҳар икки раҳбарни ҳаммa учун тинчлик ва хавфсизлик манфаатлари йўлида яқин ҳамкорликка қадам қўйишга тайёрлиги учун олқишлади”, — дейилган Оқ уй баёнотида.

9 сентябр куни Исроил илк бор Қатардаги ҲАМАС мақсадларига зарба берган эди. Дохада портлашлар содир бўлган, у ерда ҳаракатнинг сиёсий раҳбарияти жойлашган. Бу қадам дунёда кескин реакция уйғотди: Қозоғистон, БМТ ва араб мамлакатлари ҳужумни суверенитет бузилиши деб баҳолади, АҚШ ва Европа эса очиқ норозилик билдирди.

Ўтган ҳафта Қатар Ташқи ишлар вазирлиги маълум қилишича, Тель-Авив яна Дохадаги ҲАМАС сиёсий бюроси аъзолари яшаган уйларга зарба берган. Расмий маълумотга кўра, олти киши ҳалок бўлган, улар орасида Ғазо секторидаги фаластин ҳаракати раҳбари Хумам ал-Хайюнинг ўғли ҳам бор. Шунингдек, ҳалок бўлганлар орасида Қатар ички хавфсизлик махсус бўлинмаси ходими ҳам бор.