Хитойда вазирдан кейин дипломатлар ҳам йўқолди

Хитойда Ташқи ишлар вазири Цин Ганнинг сирли йўқолишидан кейин бу сафар партиянинг йирик дипломатларидан бири — Лю Цзяньчао ҳам уч ойдан бери кўринмай қолди. Wall Street Journal нашрининг ёзишича, Лю Цзяньчао интизомий текширув доирасида ҳибсга олинган бўлиши мумкин. Унинг ўрнига Лю Хайсин тайинланиши эса Пекинда “тасфия тўлқини” ҳақидаги иддаоларни кучайтирди.

Хитой Европа ишларида тажрибали дипломат бўлган Лю Хайсинни Коммунистик партиянинг дипломатик тузилмаси ҳисобланган Халқаро алоқалар вазирлиги раҳбарлигига тайинлади. Бироқ бу тайинлов, қарийб уч ойдан бери йўқолиб қолган унинг аввали Лю Цзяньчао тақдири юзасидан саволларни янада кучайтирди.

Пандемиядан кейин Хитойнинг дипломатик очилишида энг кўзга кўринган шахслардан бири бўлган Лю Цзяньчао июль ойи охирида хориж сафарида қайтгандан кейин оммавий майдонда кўринмади. Wall Street Journal маълумотича, у интизомий суриштирув доирасида ҳибсга олинган бўлиши мумкин.

Хитойда 2023 йилда сирли тарзда йўқолиб қолган ўша пайтдаги Ташқи ишлар вазири Цин Ганнинг тақдири ҳали ҳам ёдда.

62 ёшли Лю Хайсин фаолиятининг муҳим қисмини Европада ўтказган. У Францияда давлат бошқаруви бўйича таълим олган, Хитойнинг Париж элчихонасида ишлаган. Кейинчалик Ташқи ишлар вазирлигида Европа ишлари бош бошқармаси ва Миллий хавфсизлик қўмитасида юқори лавозимларда фаолият юритган.

Лю Цзяньчао эса бир пайтлар янги ташқи ишлар вазири лавозими учун асосий номзод сифатида тилга олинган кучли дипломат эди. Унинг йўқолиши Хитой раҳбари Си Цзиньпиннинг “интизом кампанияси” доирасидаги партия ичидаги тасфиялар билан боғланмоқда.

2012 йилдан буён 6 миллиондан ортиқ амалдор коррупция ва “номувофиқ ҳатти-ҳаракатлар” сабабли жазоланган.